Ang plano sa Lalawigan sa Sugbo nga patas-an ang suweldo sa mga nurses ug doktor sa 16 ka mga ospital nga gipadagan sa Kapitolyo usa ka timaan sa pagpangandam ug pagtan-aw sa mas halapad nga panan-awon sa kalambuan sa serbisyo’ng medikal. Apan samtang maayo ang tuyo, kinahanglan kini tan-awon kon makasugakod ba ang kagamhanan alang long-term sustainability niini.
Sa kasamtangan, daghan sa mga graduate sa nursing ug medisina ang modawat og job order (JO) nga trabaho aron lang makasugod ug praktis — bisan pa man sa kawalay seguridad sa trabaho, kakulang sa benepisyo, ug gamay nga suweldo. Kini nga sistema mahimong praktikal sa operasyon sa mga ospital, apan usa kini ka sayong paagi nga mosangpot sa padayon nga kakulang sa medical personnel. Kon ang sistema magpabilin nga ‘stepping stone’ padulong sa gawas sa nasod, ang atong mga ospital magpabiling magkuwang sa kwalipikado ug dedicated nga medical workers.
Ang tinguha ni Governor Pamela Baricuatro nga pausbaw ang kalidad sa mga ospital pinaagi sa infrastructure, equipment ug human resources usa ka laudable nga paningkamot. Apan dili lang kasingkasing ang kinahanglan aron mopadayon ang serbisyo — kon dili hustisya, seguridad sa trabaho, ug patas nga suweldo. Ang komentaryo sa usa ka netizen sa Facebook post sa gobernador nagtumbok sa sentimyento sa dangatan sa mga medical worker: “tingali nangita mo og nurses nga adunay kasingkasing motabang, apan kamo walay kasingkasing mobayad ug morespeto kanila.”
Makatarungan ba nga ang usa ka propesyonal nga nagtugyan sa iyang kinabuhi aron moluwas sa kinabuhi sa uban, makadawat og suweldo nga dili igo sa panginabuhi? Samtang ang mga scholarship ug partnership initiatives sa gobernador mahimong makatabang sa umaabot.
Ang plano sa pagtaas sa suweldo kinahanglan taparan og transparency sa hiring process, klarong criteria sa regularization, ug mga insentibo nga makapapabilin sa atong mga health workers dinhi sa Sugbo. Dili igo nga ipangayo ang ilang “passion to serve,” kon walay ipakita nga institutional commitment sa ilang kahimtang isip propesyonal.
Sa ulahi, ang kalampusan sa usa ka healthcare system dili masukod sa gidak-on sa building o kahinungdanon sa seremonya, apan sa kalidad sa mga tawo nga nanarbaho niini — mga nurses ug doktor nga gipangga, gipangayoan og serbisyo apan sa daghang higayon, gipakyas sa sistema nga ilang gisilbihan.
Ang pagtaas sa suweldo dili panabang, kondili hustisya. Ug kini ang unang lakang aron ang kasingkasing sa pag-alagad dili lang mahabilin, kondili molungtad sa kaugalingong yuta.