Laing viral video base sa kuha sa CCTV footage sa kalsada sa Barangay Basak, Dakbayan sa Lapu-Lapu diin nakita ang nahitabong ‘road rage’ tali sa kawani sa city hall ug motorista nga nahitabo niadtong Miyerkules. Hunyo 18, 2025.
Ang maong insidente magsilbeng pahimangno nga adunay dakong katungdanan nga gidala ang mga alagad sa katawhan isip kawani sa gobiyerno bisan pa sa ilang pribadong kinabuhi. Ang nahitabong bugno nisangpot sa pagpadangat og pormal nga reklamo sa naagrabiyado nga rider batok sa maong city hall employee.
Isip mga tinugyanan sa pagtunol og serbisyo publiko, ang mga empleyado sa city hall dili lang gikatakda sa papel nga administratibo apan nagrepresentar sab sila sa institusyon nga ilang gialagaran. Ang ilang kinaiya, lihok, ug interaksyon sa katawhan maoy hulagway nga makita sa komunidad sa kinatibuk-an.
Busa, bisan ang usa ka insidente nga mahitabo gawas sa opisina apan naglambigit sa personal nga pamatasan, dili angay sundon. Kini usa ka pahinumdom sa integridad sa serbisyo publiko dili kutob ra sa sulod sa City Hall apan lakip na sa adlaw-adlaw nga kinabuhi.
Ang paghatag og 72 ka mga oras ngadto sa empleyado aron motubag sa reklamo usa ka husto ug legal nga lakang. Ang tinuod nga isyu mao ang moral ug etikal nga responsibilidad. Kon ang usa ka kawani malambigit sa hiwi nga binuhatan, o maoy tinubdan sa kasamok hilabi na nga adunay bayolente nga gihimo, unsaon pa kaha nato pagsalig nga mohimo og patas ug matinud-anon sa iyang opisyal nga gimbuhaton?
Ang gisulti ni City Administrator Danilo Almendras nga ang sunod nga lakang nagdepende sa desisyon sa reklamante, apan ang dakbayan ug ang mayor adunay obligasyon nga magpakita og tin-aw nga baruganan: nga ang bisan kinsa nga kabahin sa gobyerno nga magpakita og dili angay nga pamatasan, bayolente man o dili, aduna gyud sangputanan. Dili lang sa paagi sa settlement mahilot ang isyu kon di sa institusyonal nga proseso nga naghatag og saktong silot o pamaagi batok sa mga dili angay nga binuhatan.
Kini nga panghitabo usa ka kahigayunan nga masusi pagbalik ang mga pamatasan, training, ug disiplina sa mga kawani sa City Hall. Dili igo nga maghulat ra sa reklamo ang lokal nga gobyerno, kinahanglan adunay proactive nga mga lakang aron mapalambo ang kultura sa serbisyo publiko nga puno sa respeto, pagpugong sa emosyon, ug profesionalismo.
Ang kahimtang karon dili lang bahin sa usa ka away sa karsada. Kini usa ka pagsulay sa karakter sa lokal nga pamunoan ug sa ilang determinasyon nga ipadayon ang kredibilidad sa ilang institusyon. Sa katapusan, ang katawhan ang motimbang kon ang ilang mga alagad tinuod bang modelo sa katarungan ug integridad taliwala sa init nga sitwasyon.
Ang pagserbisyo sa katawhan usa ka dakong pribilehiyo nga gisalig sa usa ka kawani sa gobyerno. Apan ang pagkahimong usa ka alagad sa publiko dili lang kutob sa oras sa trabaho o sulod sa opisina. Kinahanglan kining ipadayon bisan pa sa personal nga oras ug pribadong kinabuhi.
Kay ang pamatasan sa usa ka empleyado sa gobyerno nagtan-aw sa tanang oras.