Human sa kamatayon sa 23-anyos nga basketbolista ug graduate sa Civil Engineering nga nadasmagan sa usa ka sports utility vehicle (SUV), gikataho nga dunay netizen nga namasangil kang Cebu City Mayor Michael Rama nga nalambigit sa hitabo.
Wa kini palabya sa mayor, iya dayon kining gitubag. Karon nakahukom na ang chief executive sa pagkiha sa namasangil kaniya. Sakto kaayo ni ang hukom sa mayor kay grabe na kaayo ni nga pagyaga-yaga sa iyang pagkatawo bisan kon ang intensyon tingali sa poster komedya lang.
Ang komedya lahi na, kon ang usa ka importante kaayo nga tawo imong pasanginlan sa usa ka kontrobersyal nga krimen ug naa pa sa social media. Below the belt na kaayo na nga komedya. Unya sakyan sa mga kontra, ibalikbalik na, madugayan mahimo nang tinuod.
Ang mga sugilanon bitaw nga mugna lang sa huna-huna sa usa ka tawo, gipalutaw nga tinuod, sama na og urban legend nga duna nay dagway sa katinuod.
Maagwanta sa mayor ang pagkwestyon sa iyang panglawas kay tinuod man sab, ang kahimtang sa iyang panglawas usa ka isyo nga publiko tungod sa iyang katungdanan sa pagdumala sa Dakbayan sa Sugbo. Mahimong siya makwestyon kon unsa ang tinuod nga kahimtang sa iyang panglawas.
Sama kaniadto kang anhing mayor Edgardo Labella nga nagsulod gawas sa ospital apan tak-om ang iyang pamilya sa tinud-anay nga kahimtang niya. Diha pa guy nahimo'ng isyo ang pagpahulagway sa kanhi mayor nga naghupot og mantalaan samtang naghigda sa hospital bed.
Ang pagpasangil sa usa ka mayor nga nalambigit sa usa ka krimen nga nitumaw nga siya nagpabaya, nitago sa kaakuhan, lahi sa isyo sa panglawas. Busa, sakto kaayo ang hukom ni Rama sa pagkiha sa mga netizen nga below the belt na na ang alegasyon.
Magtudlo usab ni sa daghang netizens karon og leksyon, nga gikinahanglan diay nga responsable sa pag-post, di magpataka bisan sa social media, bisan reaksyon lang kini sa usa ka post.
Daghan na kaayo ang mang-bully sa mga post ug reactions nga way paghuna-huna nga sila nakapanginsulto na ug nakasamad na og balatian sa hingtungdan.
Tukma kaayo sa panahon ang pagkiha sa mayor ning mga tawo nga kuwang sa pagtahod, bisan na lang sa pagkatawo sa local chief executive. Di kini matawag nga komedya lang. Seryuso ang pagpataka og pamasangil.