Editoryal: Pagpanaugdaog sa China

File photo
File photo

Nagsunodsunod ang pagpanghasi sa China sa Pilipinas sa West Philippine Sea. Niadtong Sabado, Disyembre 9, nigamit og water cannon ang dagko nga mga barko sa China Coast Guard sa mga barko sa Bureau of Fisheries and Aquatic Resources (BFAR) duol sa Bajo de Masiloc.

Di pa igo, ilang gibabagan ang mga mananagat nga gusto untang mokuha og supply sa mao nga mga barko. Hinabang kini sa kagamhanan kanila taliwa sa nagkagamay nga kuha sa mao nga kadagatan tungod sa pagpanghawod sa China.

Sa Dominggo, Disyembre 10, gi-water cannon sab sa China Coast Guard ang mga supply boat nga gagmay nga giabangan sa kagamhanan alang sa re-supply mission sa Ayungin Shoal.

Di lang ang Pilipinas maoy gihasi sa China. Bisan ang Australian Royal Navy nakatilaw sa ilang kabangis pinaagi sa paggamit sa ilang sonar samtang ning-dive ang mga frogmen aron unta tangtangon ang pukot nga nakabitik sa ilang barko.

Giangkon sa China ang hapit tibuok dagat sa South China Sea, tipik niini gitawag sa Pilipinas og West Philippine Sea (WPS) base sa ilang 10-dash line nga hapit na niabot sa kabaybayunan sa nasod.

Taliwa sa ilang pagpanghasi, nindot kaayo og gipanulti si Chinese President Xi Jinping sa iyang pagpakigtagbo sa mga lider sa kanasuran, apil na niini si Presidente Ferdinand Marcos Jr.

Mao ni ang giingon ni Philippine Defense Secretary Gilberto Teodoro nga double talk nga taktika sa China. Nindot kaayo ug gipanulti ug panaad, apan lahi ang ilang gibuhat sa kadagatan.

Lami sab kaayo sila’ng paminawon sa ilang pamahayag batok sa Israel sa pag-atake niini sa Ghaza. Apan unsay diay ang ilang gibuhat sa ordinaryong mga mananagat sa Pilipinas? Ilang gibabagan, gipanghasi, kuhaan pa sa ilang mga kuha nga isda sa kadagatan.

Busa, maayo bang silingan ang China? Lami ka­ayo sila modala og estorya apan sa pagkatinuod, madaugdaugon. Taktika nila ang double talk.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph