Ang malampuson nga operasyon sa Land Transportaion Office (LTO) batok sa mga gipalusot nga imported nga sakyanan nga niresulta sa pagkasakmit sa labing minos 65 ka smuggled nga sakyanan, usa ka testamento sa gihingusgan ang kampanya batok sa ilegal nga importasyon ug pag-convert sa mga sakyanan.
Ang pagpatuman sa Republic Act (RA) 8506, nga nagdili sa pagparehistro ug operasyon sa right-hand drive nga mga sakyanan sa kabalaka sa kaluwasan sa publiko, usa ka lakang nga nisubay sa husto nga direksyon. Ang pahayag ni LTO Chief Assistant Secretary Vigor Mendoza II nga niingon: “Ang ating mensahe ay itigil na po ninyo ito” ug ang iyang pagpasalig nga “Tuloy-tuloy po ito, hindi po ito ningas-kugon” naghatag og paglaom.
Nasayran nga ang gihimong pagronda sa maong mga sakyanan niadtong Lunes, Hunyo 9, 2025, sa Barangay San Isidro, Talisay City maoy ikatulo na nga lokasyon nga gi-target human sa Quezon City ug Davao City diin nagpasabot nga ang problema lapad ug nakagamot na.
Ang pagkasikop sa usa ka Peruvian national nga giingong operator sa autoshop sa Talisay City nagpaila sa presensya sa usa ka organisado nga network, posible nga naglambigit sa mga langyaw nga nasyonalidad. Kini nagpalig-on sa panginahanglan alang sa usa ka komprehensibo ug hiniusang pamaagi, dili lamang sa pagpanakop apan ang pagbungkag sa tibuok kadena sa suplay — gikan sa ilegal nga importasyon, pag-assemble, ug pagbaligya.
Ang presyo sa mga sakyanan, P200,000 ngadto sa P250,000, nagpakita nga adunay andam nga merkado alang niini nga nagpasiugda sa panginahanglan sa pag-edukar sa publiko bahin sa mga risgo sa kaluwasan ug sa legal nga implikasyon sa pagpalit niining mga ilegal nga sakyanan.
Samtang ang “strict enforcement of the law” gikinahanglan aron mapugngan ang mga aksidente, kinahanglan sab nga tan-awon ang gamut nga hinungdan nganong nilambo ang maong ilegal nga negosyo.
Aduna bay mga kal-ang sa atong mga balaod o sistema nga gipahimuslan? Unsaon nato pagpalig-on ang atong mga utlanan batok sa pagpasulod sa mga kontrabando? Ug labaw sa tanan, unsaon nato pagsiguro nga ang pagpatuman sa balaod dili lang kutob sa pagpanakop, kon dili molungtad sa paghatag og silot sa mga responsable ug pagpapas sa posibilidad nga mahitabo kini pag-usab?
Ang maong operasyon usa ka dako nga lakang apan usa lamang kini ka tipik sa dako nga hulagway. Aron hingpit nga makab-ot ang tumong sa LTO, gikinahanglan ang usa ka holistic nga pamaagi nga naglakip sa padayon nga pagpanakop, pagbungkag sa mga sindikato, pagpalig-on sa mga palisiya, ug malungtarong kampanya.
Ang atong katuyoan dili lamang ang paghunong sa dagan sa ilegal nga mga sakyanan, kondili ang pagsiguro sa kaluwasan sa matag Pilipino sa kadalanan.