Dalaygon kining plano ni Cebu City Mayor Nestor Archival nga magpataod og drinking fountains sa nagkadaiyang pampublikong mga lugar sa dakbayan.
Kini nga lakang, nga tipik sa mag-unang 100 ka mga adlaw ni Archival sa iyang katungdanan, adunay duha ka mahinungdanong mga katuyoan – makunhoran ang paggamit og plastik ug mapalambo ang kalikupan.
Usa kini ka tin-aw nga pamatuod sa adbokasiya ni Archival nga makunhoran ang paggamit sa plastik.
Sa usa ka kalibutan nga nagsagubang sa nagkadako nga krisis sa plastik nga basura, ang inisyatibo ni Mayor Archival usa ka dako nga kontribusyon.
Sa usa ka interbyu atol sa Waste Sorting Seminar, usa ka proyekto sa Junior Chamber International (JCI) Japan kauban ang Barangay Luz, niadtong Sabado, Hulyo 5, 2025, si Archival nagkanayon nga kon aduna na’y public drinking fountains, hayan madasig ang mga tawo sa paggamit og reusable tumblers aron makadaginot sa kuwarta.
Bisan kinsa na man seguro, mas mopili nga mosawod na lang sa public drinking fountain gamit ang reusable tumbler kaysa mopalit og mineral water nga nagkamahal na sab gyud ning panahuna. Gawas nga libre, unlimited pa ang mainom sa public drinking fountain.
Makapahimulos gyud niini ang yanong mga Sugboanon ug hasta ang mga mobisita sa dakbayan.
Labing seguro, ipangtaod ang public drinking fountains sa mga pier, terminal, eskuwelahan, plaza ug uban pa nga mga lugar nga adunay daghang mga tawo.
“Ang mga tawo, they are going to refill, magdala sila og tumbler, deretso na nila ibutang,” matod pa ni Archival.
Gipasabot ni Archival nga sa usa lang ka public drinking fountain, hayan puwerte na ka daghang mga botelyang plastik ang dili maapil sa mga basura nga magkatag sa kadalanan ug hasta sa kadagatan.
Kini nga inisiyatibo ni Archival angayang suportahan sa publiko ug dili abusaran aron mahimo kining malungtaron.
Ambot kon unsa’y mga pamaagi ni Archival aron maampingan ang matag public drinking fountain ug dili kini daling maguba.
Matod ni Archival nga kining maong proyekto nagpamatuod nga ang iyang administrasyon mapinanggaon sa katilingban ug hasta sa kalikupan.
Pipila pa lang ka mga adlaw gikan sa iyang opisyal nga paglingkod sa puwesto, aduna na’y nianinaw nga maayong proyekto si Archival.
Unsa pa kaha ang ubang maayong mga proyekto ang anaa sa hunahuna ni Archival. Kon unsa man gani kini, kudos daan kanimo Mayor Archival.