Editoryal: Pagsiaw sa mga pangransak

Editoryal: Pagsiaw sa mga pangransak
Editorial Cartoon by Ariel Itumay

Sunodsunod na ang pagpangatake sa mga tawo nga magtaptap sa mga balay sa lungsod sa Argao nga nagpaila nga anti drug operatives o mga polis. Ang uban nilang target gikataho nga mga nalambigit sa ilegal nga drugas.

Apan ang labing uwahi nga mga biktima nanghimakak nga sila nalambigit sa illegal drugs. Gipangdala ang ilang mga sakyanan, sama sa multicab ug motorsiklo, apil na ang kwarta.

Nipasangil pa ang usa kanila nga gidagit siya sakay sa usa ka pick-up ug gipakanaug sa Valladolid, dakbayan sa Carcar.

Mga usa ka buwan kapin ang nakalabay, usa usab ka lalaki ang gisignit sulod sa ilang balay sa mga lalaki nga armado ug nagtaptap.

Kini nga mga diskarte gihimo ni kaniadto pa sa ubang mga dapit sa Sugbo apan way bisan usa ning grupoha nga nadakpan. Makapahibulong usab ang kakuwang og aksyon sa mga polis ning mga hitaboa.

Apan klaro kaayo nga ang mao nga grupo o mga grupo dunay background sa ilang mga target. Kay kadaghanan sa ilang girumbo nangalambigit man sa illegal drugs. Busa, dako ang posibilidad nga dunay nalambigit nga law enforcer ning mao nga modus kay nganong duna man silay background sa mga biktima.

Mao lagi makapahibulong usab ang kakuwang og lakang ug kaikag sa mga polis sa pagsusi ning mga hitaboa, di lang sa Argao, apil na sa ubang mga dapit sa Sugbo. Ingon sa ang mga reklamante pa ang manguha og mga ebidensya aron malihok.

Ang local government units (LGU) ingon sa wa lang usab nagpakabana. Way pamahayag ug wa gitawag ang atensyon sa kapulisan aron unta ma-pressure. Mga barangay official klaro usab nga nangahadlok kay hayan duna silay makahadlok nga nahibaw-an.

Makaduda na hinuon nga duna kini pagtugot sa kadagkuan hinungdan nga nagpaka buta-bungol sila sa mga hitabo. Apan kon kini mao ang hulip sa mga pagpamatay, abuso lang gihapon ni. Di gihapon ni makapaundang sa mga durugista.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph