Ingon sa sunodsunod na sab ang mga krimen sa tulis dinhi sa dakbayan sa Sugbo. Niadtong Huwebes sa gabii dunay usa ka PUJ nga gisakyan og tulisan apan swerte ang usa ka babaye kay abtik nga nakalayat sa bentana sa sakyanan.
Niadtong Biyernes, usa usab ka 40-anyos nga babaye gitulis ug gipatay sa iyang kanhi kauban nga lalaki nga dali usab hinuon nga nasikop tungod sa pag-abag sa mga saksi sa ningresponde nga mga polis. Nabawi dayon ang kwarta ug napriso na ang suspek.
Di pa dugay ang pagtulis sa usa ka pawnshop sa dalan Colon, apan nadakpan gilayon usab ang mga suspek. Mao ni ang nakaayo sa mga hitabo. Apan di ba mas maayo ang pagpugong kay sa pagsulbad sa nahitabo nga krimen?
Asoy sa usa sa mga suspek sa tulis sa pawnshop nga giingon nga niluwat og extra-judicial confession nga naniid siya kon wa bay mga checkpoint ang kapulisan. Sulod sa pipila ka adlaw kini niyang gihimo.
Human siya nakabantay nga way checkpoint, diha na nila gilusad ang tulis. Sa ato pa, ang checkpoint makapahadlok o makapanagana sa mga kriminal. Mao gani nga minos kaayo ang mga krimen niadtong panahon sa pandemic tungod sa kadaghan sa mga checkpoint sa kapulisan.
Gawas sa checkpoint, ang kanunay nga pagpatrolya, labina kon maglakaw lang, dako kaayo og ikatabang nga mahadlok ang mga kriminal.
Apan masabot usab nga di makalukop ang kapulisan sa pagpatrolya sa kadalanan. Dinhi unta mosulod ang mga barangay, pinaagi sa ilang mga tanod. Dako kaayo og ikatabang isip force multiplier ang mga tanod, apan ingon sa mga kalag kini sila. Di makita nga magpatrolya sa kadalanan.
Maayo unta nga mosulod ang mga local government unit sa pagdasig sa mga barangay sa pag-abag sa pagpatrolya sa kapulisan, labina sa lawom nang gabii sa crime-prone areas.
Unya, ang kapulisan, magpermanente niining patrolya, di kay magtuhiktuhik lang sa pagbuhat.