Human sa tulis sa usa ka tindahan sa mga alahas niadtong Nobiyembre sa miaging tuig, lain na sab nga mga tindahan ang giigo, ning higayona duha na nga gidungan kay nagtupad ra.
Nahitabo kini bisan sa presensya sa mga pulis nga nag-roving apan giingon nga mao ray gipanid-an. Human sa duha ka mga adlaw, ang kalamboan mao ra ang pagkakaplag sa usa ka motorsiklo nga maoy usa sa mga gisakyan sa mga tulisan sa ilang pag-eskapo.
Hayan kinawat sab ang mao nga motorsiklo kay kinsa man kaha nga boang nga tawo ang mobiya sa ebidensya nga mosangko sa pag-ila kanila?
O kaha basin gipisapisa kini, kanang gi-assemble nga motorsiklo aron di ma-trace nga maoy sagad gihimo sa mga kriminal.
Sa tulis sa maging tuig, duna nay gitumbok nga mastermind ang kapulisan apan wa pa gani motangkod og usa ka buwan sukad siya nasikop, gibasura dayon ang kaso batok kang Jiger Geverola tungod sa kakuwang sa mga ebidensya. Naunsa na kaha ang uban nga nalambigit?
Unta, himuong prayoridad sa kapulisan ang pagbantay sa mga dapit nga makadani sa mga tulisan, sama sa mga tindahan sa mga alahas, money changer, ug bangko.
Sa mao nga mga establisemento, ang labing huyang og seguridad mao ang mga tindahan sa alahas ug money changer.
Sagad sa mga tindahan sa mga alahas dali kaayong sudlon og mga tawo kay gikinahanglan sa mga kustomer nga motan-aw sa gi-display nga mga alahas. Busa gikinahanglan ang presensya sa mga pulis ning mga dapita.
Pila man diay ka porsyento sa mga pulis ang naa sa kadalanan gipakatap? Di ba kaha kadaghanan naa lang sa ilang buhatan? Kay atol sa tulis, duna may duha ka mga pulis, apan sa ilang paglakaw, ang mga tulisan nakahigayon dayon sa pag-igo sa duha ka mga establisemento.
Kuwang ra ang duha ka mga pulis nga naglibotlibot sa dapit kay kon duna pay lain, hayan di makahigayon ang mga tulisan. Magpanghadlok sab sila sa pagbuhat sa krimen.
Kini nga hitabo nagpakita sa kapakyas sa intelligence community. Kay kon maayo pa ang intelligence gathering, hayan di mahitabo ang pagpanulis kay napugngan na kini.
Ang labing maayo unta, wa nahitabo ang krimen. Mao ni ang ideal nga sitwasyon unta. Pila na man ka dagkong mga krimen, sama sa tulis, nga nag-atubang og blangko nga bungbong ang mga otoridad?
Pila na man ang wa masulbad kay puro ra persons of interest ang natumbok, wa moirog ang imbestigasyon?