Ang bag-o nga isyu sa wala pagsinabtanay tali sa buhatan ni Gov. Pamela Baricuatro ug ni Rep. Duke Frasco mahitungod sa gisugyot nga pag-upgrade sa Cebu Provincial Hospital sa Danao City nakapatumaw og seryosong mga pangutana.
Ang sentro sa isyu kon unsa ang labing maayo nga pamaagi sa pagpauswag sa serbisyo sa panglawas alang sa mga residente sa North Cebu: usa ka congressional bill o usa ka mas direktang pamaagi sa administrasyon.
Si Frasco nisugyot nga himuon ang pasilidad nga North Cebu Medical Center (NCMC) ug ibutang kini ubos sa pagdumala sa Department of Health (DOH).
Pinaagi sa pagbalhin sa pundo ug pagdumala sa ospital ngadto sa nasyonal nga gobiyerno, makapahupay kini sa pinansyal nga palas-anon sa probinsiya.
Kini nga lakang, matod niya, makatabang sab sa pagpaluag sa nagdasok nga mga pasyente sa Vicente Sotto Memorial Medical Center (VSMMC) sa Cebu City.
Bisan pa, si Baricuatro, pinaagi sa iyang anak ug health consultant sa Kapitolyo nga si Dr. Nicole Catalan, supak niini. Ang ilang argumento mao nga ang usa ka congressional bill dili gikinahanglan aron ma-upgrade ang usa ka ospital.
Ang pag-upgrade sa ospital magsunod sa mga sumbanan sa DOH nga naglakip sa pag-hire og dugang medical personnel ug pagkuha og bag-ong kagamitan.
Usa sa mga sumbanan nga gituman na sa Kapitolyo mao ang pag-hire og 12 ka bag-ong mga doctor nga ipakatap sa nagkalainlain nga tambalanan sa Probinsiya sa Sugbo.
Apan dili pa kini paigo, sanglit ang Kagamhanan sa Probinsiya sa pagkakaron nanginahanglan og 78 ka dugang nga mga doktor aron mahulipan ang kakuwang sa kawani.
Si Catalan niingon nga ang provincial government makahimo pagdumala niini nga mga pag-upgrade, lakip na ang pagtubag sa dinalian nga panginahanglang medikal sa publiko.
Matod ni Catalan nga ang proseso sa lehislatura hinay kaayo nga makalangan sa gikinahanglan nga mga kalambuan.
“You know it’s no big deal because as we are engaging with the district hospitals, mga infirmaries, we are preparing them already even ang atong mga infirmaries ato na ni silang gi-prepare to level 1 hospitals, from level one ato sab ni silang gi-prepare for level 2,” asoy sa gobernador atol sa usa ka press conference niadtong Miyerkules, Agusto 12, 2025.
“Sauna gasige ni sila og suroy-suroy karon nagsige na man og sakay-sakay. Sakay-sakay pa more,” dugang ni Baricuatro.
Gitataw ni Baricuatro nga ang Kapitolyo wala makadawat og bisan unsa nga pormal nga komunikasyon gikan ni Frasco kabahin sa iyang sugyot ug nidugang nga ang tanang impormasyon nakita ra sa social media. Sa katapusan, ang mga tawo sa Sugbo ang makabenepisyo gikan sa usa ka mas maayo nga kagamitan ug mas maayo nga pagpadagan nga ospital sa Danao.
Kon kini makab-ot pinaagi sa usa ka bag-ong balaod o pinaagi sa kaugalingong mga paningkamot sa probinsyal nga gobiyerno mao ang sentro nga pangutana.