Sa mga konsumidor ilabi na niadtong mahiligon mama-init, o mag-snacks og pan ayaw mo og kahibulong nga adunay pagsaka sa presyo, kon wa man gani niumento ang kantidad, ang kalidad niini basin og gipagamyan ang gidak-on o adunay kausaban sa timplada.
Kini epekto sa padayon nga pagsaka sa presyo sa ingredients o mga sagul sa paghimo og pan, lakip na ang production cost.
Gumikan niini, gipanawagan ni Senador Sherwin Gatchalian ang Department of Trade and Industry (DTI) nga susihon ang presyo sa pan ug gikinahanglan nga klaro ang paghatag kon ugaling patas-an ang presyo nga adunay basehanan aron nga dili masakripisyo ang mga konsumidor.
“The government should explore measures to stabilize production costs, such as securing reliable chains for wheat and other essential ingredients and providing necessary support for bakers to enhance production efficiency,” pamahayag ni Gatchalian.
Angayan nga ang kagamhanan mohimo og proactive nga lakang aron nga mapugngan o dili magpalabi og pataas sa production cost. Lakip na sa pagpaseguro nga adunay igong supply sa trigo (wheat) ug ubang gikinahanglang sagul sa pan, ingon man sa paghatag og pinansyal o teknikal nga suporta sa mga bakers o bakery. Ang pagtabang sa lokal nga panaderia aron nga dili magpalabi og pataas sa presyo samtang mapadayon usab ang kalig-on sa ilang negosyo.
Gawas sa pan, ang pagsaka sa presyo sa ubang nag-una nga palitunon sama sa gatas, de-lata, ug panginahanglanon sa panimalay nagpakita og mas lapad nga kabalaka bahin sa inflation ug cost-of-living challenges.
Sa labing uwahi nga suggested retail price bulletin sa DTI niadtong Pebrero 1, 2025 adunay 77 sa 191 nga gisusi nga mga palitunon ang misaka ang presyo apil na niini ang duha ka mga inila nga brand sa pan.
Kinahanglan sab nga ipatuman sa gobiyerno ang mga lakang aron mapanalipdan ang mga konsumidor batok sa nagpasulabi nga pagsaka sa presyo samtang suportahan sab ang mga industriya nga apektado sa maong sitwasyon.
Sa kataposan, ang tinguha nga makab-ot nga presyo sa mga nag-una nga palaliton sama sa pan usa ka isyu sa kasigurohan sa pagkaon ug kalig-on sa ekonomiya. Kinahanglan magtinabangay ang gobiyerno, pribadong sektor, ug mga policymaker aron makamugna og dugang solusyon nga nagbalanse sa kaayohan sa mga konsumidor ug makapadayon ang mga negosyo sa industriya sa pagkaon.