Normal na kaayo ron ang baha kon magbunok ang uwan. Sa kapaspas sa paglambo sa Sugbo, di na ni ikahibulong kay ang mga land development,labina sa kabukiran o mga dapit nga elevated, mo-contribute sa baha.
Ang mga kongkreto nga bahin sa matag land development, contributor sa paspas nga pag-agas sa tubig.
Ang karsada nga kongkreto ug dagkong drainage systems sa dagkong mga subdivision, mga building sama sa condo nga naa sa ibabaw, contributors sa baha sa kapatagan.
Dunay mga dapit sa Metro Cebu nga wa makasinati og baha kaniadto. Sa Dakbayan sa Sugbo, sa Colon, dali makalawom og maayo ang tubig.
Sa baha niadtong Huwebes dihang nagbunok ang uwan, maorag naa sa salida nga waterworld ang downtown sa Dakbayan sa Sugbo.
Natural nang tadtaran sa baha ang kagamhanan, apan wa gikonsiderar sa katawhan ang nagsaka nga tubig sa dagat kon magtaub. Nagsaka sab ang level sa dagat.
Mao bitaw nang dunay mga dapit kaniadto nga layo ra unta sa tubig, apan karon maabot na sa bawod.
Panahon na nga ikonsiderar sa mga lider sa kagamhanan ug negusyo ang suliran sa baha sa pagplano sa umaabot nga mga development.
Sa ato pa, ikonsiderar ang baha sa dugang pagpalambo sa downtown area. Sama sa angay bang mobubo og dugang puhonan sa mao nga dapit taliwa sa kanunay nga pagbaha ning nanglabay nga katuigan bisan sa makadiyot lang nga pagbunok sa ulan.
Sa pagkakaron, nagpadayon ang pagsaka sa level sa kadagatan, matod sa mga eksperto.
Kon magpadayon ang pag-init sa kalibutan, daghan sa mga isla ang maapektuhan, apil na ang Sugbo.
Busa mas maayo nga dunay ipahigayon nga mga konsultasyon ug pagtuon alang niini.
Mao na kini ang himuon nga tamdanan sa matag local government unit.
Kon ang mga pagpalambo sa patigayon gahinan og panahon sa pagtuon, labing maayo kon iapil sab ang mga publiko ug pribadong mga puy-anan aron mahilayo sa kakuyaw.
Makaguol lang kay klaro kaayo nga wa naglantaw niini ang mga opisyal sa kagamhanan.