Sa kalambuan sa Senado isip impeachment court, gipabalik ang reklamong impeachment batok kang Bise Presidente Sara Duterte ngadto sa House of Representatives, nagpakita ug pagsukod kon unsa ka kalig-on sa atong institusyon sa hustisya. Sa ilang unang adlaw nga pagpanglingkod isip husgado sa impeachment, wa hatagi og gibug-aton ang privilege speech ni Senador Ronald ‘Bato’ dela Rosa nga nagpa-dismiss sa impeachment complaint.
Giinsistir nga kinahanglan pa klaruhon sa House of Representatives kon nalapas ba ang “one-year ban” nga natala sa Konstitusyon. Apan kon tinuoray, aduna untay hustong pamaagi aron matubag kini nga pangutana sulod mismo sa korte. Ang ilang desisyon nga ibalik ang reklamo sa Kamara nga wala pa gani makasugod og presentasyon sa ebidensya ang mga prosekutor, usa ka palas-anong lakang nga nagpahinay sa proseso.
Klaro nga ang mga senador nga nilihok sa pabor sa mosyon gikan sa kaalyado sa pamilya Duterte. Si Dela Rosa, Christopher ‘Bong’ Go, ug Robin Padilla – nagpatigbabaw sa sesyon, uban pa sa 15 ka senador nga nitambayayong kanila.
Gipunting ni Senador Robin Padilla nga ang impeachment nakababag sa ubang mga bill nga angayan pa nga tukion. Apan ang tinuod, ang impeachment usa ka batakang proseso sa demokrasya. Kini dili sagabal, kondili usa ka pamaagi aron ang mga opisyal sa gobiyerno pasabton sa ilang mga buhat. Ang pag-ingon nga kini sayang sa oras ug makadaot sa serbisyo publiko usa ka convenient excuse sa nagpahipi nilang gitinguha.
Ang pagbalik sa kaso ngadto sa Kongreso nagpasabot og paglangay sa proseso nga maoy pagduda sa uban. Ang impeachment dili angay talikdan o balibaran base sa teknikalidad. Kinahanglan nga hatagan kini og higayon nga modagan, nga mapaminaw ang duha ka kampo.
Ang Senado, isip usa ka institusyon nga gisaligan sa katawhan sa pagpatuman sa checks and balances, dili angay magpakaulipon sa pulitika sa alyansa. Kon padayon nga pagabuhaton ang pagpanalipod sa gahom, mawagtang ang kabug-at sa impeachment isip instrumento sa pagpanubag.
Sa katapusan, ang pangutana: Kinsa ba gyud ang gialagaran sa Senado—ang katawhan ba, o ang ilang mga kaalyado sa gahom?