Editoryal: Pangandam sa ting-uwan

Editorial Cartoon by Ariel Itumay
Editorial Cartoon by Ariel Itumay

Unang bagyo nisulod sa nasod ning tuiga mao si ‘Aghon’ nga naghulga sa silangang bahin sa kapupud-an, sumala sa Philippine Atmospheric, Geophysical, and Astronomical Services Administration (Pagasa) sa Biyernes, Mayo 24, 2024.

Nunot ning maong kalambuan, natapos na ba ang kainit sa panahon dala sa El Niño phenomenon? Matod ni Engr. Al Quiblat, hepe sa Pagasa Visayas, wala matapos ang El Niño bisan sa pagsulod ni Aghon karon apan, dason niya, nagkahinay na ang kainit sa adlaw nga sinyales sa nagsingabot nga ting-uwan.

Si Quiblat, nahinabi sa “Beyond The Headlines’ online news and commentary program sa SunStar Cebu sa Biyernes, Mayo 24, niingon nga duna silay sukdanan nga subayon sa pagdeklarar sa ting-uwan nga wala pa maabot sa pagkakaron.

Aron madeklarar ang ting-ulan, matod pa, kinahanglan nga dunay 25 millimeters (mm) o labaw pa sa kinatibuk-ang pag-ulan sa miaging lima ka adlaw, ug usa ka mm nga ulan sulod sa tulo ka sunodsunod nga adlaw.

Si Quiblat niingon nga si Aghon way direkta nga epekto sa Central Visayas kay adto kini moigo sa Eastern Visayas, ngadto sa Bicol region nga magkakusog sa iyang paggawas sa nasod nga gibana-bana karong Lunes, Mayo 27.

Bisan pa niini nga way direktang epekto sa atong dapit, dili mokompiyansa tungod sa posibilidad nga hinungdan kini sa pag-uwan matag karon-ug-unya sama sa miaging gabii.

Ug sa pasiunang pagbunok sa uwan, naobserbahan nga ang mga basura nanglutaw gihapon sa agianan sa tubig sama sa kanal, kasapaan ug suba sa dakbayan bisan gipanglimpiyuhan na kini dili pa lang dugay.

Nagpasabot kini nga wala pa hingpit mosunod ang mga lumolupyo sa insaktong paglabay sa mga basura labina sa mga cellophane bag, plastik nga botilya ug uban pa nga makabara sa agianan sa tubig.

Unsa na kaha kon makabwelo ang ting-ulan? Dili kita magpataka og labay sa basura. Matag usa kanato dunay dakong kaakohan sa pagpakabana para sa kaayuhan sa tanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph