Kagahapon, Agusto 25, 2024, gipahigayon ang tinuig nga Pasigarbo sa Sugbo, usa ka grandiyusong kalihukan nga gipasiugdahan sa Probinsya sa Sugbo.
Pito ka mga buwan ang nakalabay, gipahigayon ang Sinulog Festival, usa sab ka grandiyusong tinuig nga kalihukan nga gipasiugdahan sa Dakbayan sa Sugbo. Ang duha ka dagkong mga kalihukan pulos mosubay sa nag-unang kadalanan sa gitawag og Queen City of the South.
Kaniadto, pareho kining mosangko sa Cebu City Sports Complex (CCSC) apan pipila ka mga tuig ang nakalabay, sa managlahi na nga venues kini motiklop. Nagpabilin ang Pasigarbo sa Sugbo sa CCSC samtang ang Sinulog Festival nahitapon na sa usa ka dako ug bakanteng luna sa South Reclamation Project (SRP).
Kaanindot na man tingali kon parehong mabalhin ang closing ceremonies sa duha ka mga kalihukan sa mas komportable ug mas nindot nga venue – ang kasamtangang gitukod nga SM Seaside Arena. Ning maong indoor arena, nga giingong mahuman sa 2025, mas daghan ang klarong makatan-aw sa closing ceremonies sa duha ka mga kalihukan ug ang labing mahinungdanon, komportable alang sa tanan tungod kay air-conditioned man lagi.
Ang arena adunay 16,000-seating capacity kumpara sa CCSC nga pipila lang ka mga libo unya mag-antos pa sa tumang kainit o kaalimuot ang magsinardinas nga mga tumatan-aw sa Pasigarbo sa Sugbo. Sa dakong hawanan sa SRP, daghan unta ang mga tawo nga puwedeng makatunga sa closing ceremony sa Sinulog apan dili makaklaro sa pagtan-aw.
Ang CCSC ug hawanan sa SRP pareho sab dili makalikay sa maglagiting nga kainit sa haring adlaw hasta sa pagbunok sa uwan. Sa SM Seaside Arena, wala’y angayang kabalak-an – uwan man o init – gumikan kay aduna may atop nga kasaligan ug dili sab problema ang parking.
Sa mga kalambuan kabahin sa konstruksyon sa SM Seaside Arena nga makita sa mga hulagway ug videos nga gipang-post sa social media, kaanindot na man lang gyud tan-awon ning maong edipisyo nga seguradong pahigayunan og dagkong sports events, concerts, international conventions ug unsa pa diha.
Puwede gyud kining ikapasigarbo sa mga Sugboanon. Nindot gyud ning maong edipisyo. Tiaw mo na, nagtambayayong ang SM Prime Holdings ug Ayala Land aron lang matukod kini. Busa mag-abot-abot ta puhon sa SM Seaside Arena alang sa closing cremonies sa Pasigarbo sa Sugbo ug Sinulog Festival. Apan yuna ra, nagdepende pa diay kini sa mga lider sa Probinsya sa Sugbo ug Dakbayan sa Sugbo.