Dunay panultion nga nagkanayon nga “mahal ang magkasakit karong panahona.” Tinuod, dili tiaw ang kamahal sa bayad sa doktor, tambal ug pagpa-admit sa ospital.
Ang tawo magkasakit gyud sa di matagna nga panahon, apan kadaghan sa masa way health insurance nga masandigan kon magkasakit o kaha dunay emerhensiya.
Adunay Philhealth insurance sa kagamhanan apan gamay lang kini ug sagad dili igo sa dagkong bill sa mga pribadong ospital.
Ang mga kabos mamatay na lang sa pag-antos.
Busa, ang mga pasilidad sa panglawas kagamhanan dako og matabang sa katawhan sama sa dakbayan ug lalawigan sa Sugbo nga dunay gidumala nga mga ospital.
Bisan tuod na wala pa hingpit matapos ang bag-ong edipisyo sa Cebu City Medical Center (CCMC) sa Barangay Pahina Central, apan maayo nga partial kini nga giablihan alang sa pagpadayon sa serbisyo.
Gawas sa pagpalambo sa health centers sa mga barangay, dalaygon ang paghimo og pipila ka super health center sa Barangay Apas ug pagpalambo sa Guba Community Hospital sa bukirang bahin sa dakbayan.
Niadtong Lunes, Lunes, Hulyo 29, 2024, pormal na nga giablihan ang extension facility sa osptila sa Barangay Guba human sa pipila ka tuig nga nalangay tungod sa daghang isyo.
Nangulo sa pagsubo mao sila si Acting Cebu City Mayor Raymond Alvin Garcia ug Acting Vice Mayor Donaldo “Dondon” Hontiveros. Nitambong usab sila si Konsehal Joy Pesquera, Francis Esparis, ug Noel Wenceslao.
Nitambong usab ang medical practitioners nga naglakip sa medical director sa ospital nga si Grace Valdez ug mga representante gikan sa Department of Health (DOH).
Atol sa programa, gipahayag ni Garcia ang iyang mga paglaum nga mas daghang maserbisyohan niini sa bukirang bahinb sa dakbayan, lakip sa pagwagtang usab sa sayop nga pagtuo bahin sa pasilidad nga usa lang ka transfer station sa pasyente ngadto sa ubang ospital sa dakbayan.
Ang mga proyeko nga sama niini nga tataw sa magserbisyo sa katawhan dalaygon kaayo ug takos sa atong suporta.