Editoryal: Pedestrianization sa downtown sa Cebu City

Editoryal: Nagwang-wang?
EDITORYAL

Dunay plano ang kagamhanan nga maghimo og pedestrian walkways, labina sa historic area, partikular na ang Dalan Colon. Kini nga plano di ni bag-o tungod kay duna nay proposal sa paghimo niini kaniadto pa.

Gituki na gani kini sa Regional Devt. Council (RDC) kaniadto apan gipadalin ra kini. Apan maanindot kon ang pipila ka mga dapit sa downtown himuon nga exclusive sa pedestrians. Inay, butangan og mga cafe ug uban pang mga negusyo nga makapaalegre ug makadani sa tanang mga henerasyon.

Dunay mga kabalaka nga makapatay kini sa negusyo sa downtown area. Apan sa ubang mga nasod nga gi-pedestrian ang pipila ka mga dapit, buhi kaayo ang patigayon.

Kinsa may di ganahan motambay og lugar nga dunay mga pagkaunan, daghan og mapalit, di lang kay basic lang nga mga palaliton? Naay mga kalingawan nga matambungan ni bisan kinsa.

Daghan ang nasayop sa ilang pagtuo nga mamatay ang downtown area sa Dakbayan sa Sugbo tungod sa pagtumaw sa mga mall. Apan buhi man kaayo ang patigayon sa dapit ug duna na gani nagbinugtong nga Starbucks. Karon, duna na kini pipila ka mga kakompetensya apan daghan gihapon ang manganha sa American brand coffee shop, labina mga turista nga langyaw nga namuyo sab sa mga hotel ug inn sa duol.

Tingali, naa sa pagplano ug pag-package sa lugar ang paghimo niini nga malampuson. Tan-awa ra gud, ang Dalan Colon mismo makasaysayanon nga karsada isip labing karaan nga dalan sa nasod human kini gihimo sa mga Katsila niadtong 1565 kun 459 ka mga tuig ang nakalabay.

Kanindot kon kini nga karsada ipasundayag, ipaila ngadto sa mga turista pinaagi sa pagpalakaw kanila nga way kabalaka nga madasmagan og sakyanan. Mahimo pa gani kini nga pabaktasan sa pipila ka mga parada nga hatagan og permit sa local government unit (LGU) ug ang mga paradista mabansay sab nga tour guides.

Mahimo gani nga ang mga parada lang ang makasaoysaoy sa kasikbit nga mga karsada nga masakyan sa mga turista nga buot mobisita sa makasaysayanon nga mga dapit sa downtown. Makahatag pa kini og pangunabuhi sa yano nga mga paradista.

Maaninot kining mao nga plano. Kon buhi ang downtown area, mas maalegre kini og samot pinaagi sa iyang pedestrianization. Planuhon lang og maayo ug di kalimtan ang pagpahigayon og konsultasyon aron ang mga apektado mapaminaw sab sa ilang mga reklamo ug baruganan. Basin gani, daghan pang mga ideya nga makuha.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph