Sa nikatap sa social media nga giingo’ng peke nga medical bulletin ni Presidente Ferdinand Marcos Jr., wa palabya sa Philippine National Police, ingon man sa Malacañang. Ilang gipasubay kon si kinsa ang tinubdan sa maong fake post.
Tataw nga ang katuyoan mao ang pagguba sa integridad sa labing taas nga opisyal sa nasod.
Sa akong yano nga pagsabot ang maong fake news mahitungod sa panglawas sa presidente kon tan-awon sa konteksto sa politika, mahimo kining gamiton isip himan sa destabilization aron mapukaw ang pagduhaduha sa kapasidad sa Presidente sa pagtuman sa iyang katungdanan.
Laing posibleng motibo mao ang pagmaniobra sa opinyon sa publiko alang sa interes sa pipila ka indibidwal o grupo. Sa panahon nga ang social media nahimong usa sa source sa balita nga gihangop sa kadaghanan, ang sayop ug peke nga impormasyon dali rang motuhop sa pagtuo sa uban.
Ang pagpalapad sa peke nga dokumento mahimong may kalabutan sa personal, politikal, o ideolohikal nga interes nga nagtinguha sa pagdaog sa diskurso sa publiko pinaagi sa limbong ug pagpanikas.
Dili sab ikalimod ang posibilidad nga kini usa ka tinuyoang paglapas sa balaod aron lang makadani og atensiyon o ang gitawag nga forda clout.
Sa kultura sa viral nga balita, ang pipila ka tawo di magduhaduha sa paglapas sa etika ug balaod basta ang ilang katuyoan makab-ot, sama sa popularidad, likes, ug impluwensya.
Ang kagawasan sa pagsulti wa magpasabot nga kagawasan sab sa pagpamakak, labi na kon kini tuyoang nagdala og kadaot sa publiko ug naghulga sa kalinaw ug kahusay sa nasod.
Ang gihimong imbestigasyon nga gihimo sa Philippine National Police ug sa National Bureau of Investigation dili lamang hustong lakang, kondili usa ka obligasyon sa estado aron mapanalipdan ang kamatuoran, ang integridad sa institusyon, ug ang katungod sa katawhan sa hustong impormasyon.
Ang kamatuoran dili angay ilisan sa limbong ug ang demokrasya dili mahimong lig-on kon ang impormasyon nga naglibot niini puno sa peke ug malisyuso nga tumong.