Maayo ang tumong sa ordinansa nga gikinahanglan itaod na sa ilawom sa yuta ang tanang electric, telecommunications, television/cable entities nga ngil-ad kaayo sa talan-awon ang nagkagubot nga wires nga nakumbitay sa bisan asang+ dapit sa Cebu City.
Si Cebu City Councilor Jerry Guardo nga maoy nangamahan sa giaprubahan na nga balaodnon mipasabot nga sa maong paagi mapanalipdan ang power lines/wired ug uban kable sa kalamidad ug malimitahan sab ang blackouts.
Gawas pa, dili na samok tan-awon sa higayon nga mahawan sa mga nagkumbitay ug naglambud nga wires.
Gumikan sa maong paagi, mitumaw ang kabalaka nga sa higayon nga adunay pagbaha dili kaha maka-apekto kini sa underground wirings nga makaingon sa short circuits ug moresulta sa brownouts o blackouts?
Hinuon, mipasalig si Guardo nga dili kini mahitabo tungod kay ang baha diha ra sa ibabaw o surface samtang ang wirings ilubong ilawom sa yuta. Gitutokan sab sa maong underground wiring ang telco wires gumikan kay sagad niini dili live wires.
Ang pangutana pila kaha’y gilawmon sa paglubong niini? Aron nga masiguro nga di matarog o maputol sa higayon nga adunay pagkawot, pagkubkob diha sa yuta, ilabi na kon adunay mga road widening, road repair ingon man drainage system ug uban pang mga proyekto.
Aduna nay mga insedente diin adunay gihimong pagkubkob sa usa sa mga kalsada sa Lapu-Lapu City diin naigo sa back hoe ang waterpipe sa Metropoitan Cebu Water District hinungdan nga nalungag ang maong linya sa tubig nga naghatag og puwersiyo ang hitabo tungod kay daghang residente ang apektado.
Gipasabot ni Guardo nga sa higayon nga itaod na sa underground telco wires, way mahitabong power disruption, ug lahi kini sa electrical wires.
Kahinumduman sa dakbayan sa Lapu-Lapu gihapon nga sa napursige ang mga telco companies sa paghipos sa mga nangaputol ug nangalukot nilang wires sa major roads ning siyudad human mihatag og ultimatum si Mayor Junard Chan nga sa higayon nga dili kini nila mahipos sa gikatakdang petsa, way renewal sa ilang business permit ug uban nilang permits.
Kinsa may dili ganahan nga hapsay tan-awon ang major areas sa dakbayan sa Sugbo pinaagi sa paghinlo sa mga lukot ug nagyanyan nga wires.
Hinaot nga sa dili madugay masugdan na ang maong proyekto.