Gikatakdang magselebrar si kanhi Presidente Rodrigo Duterte sa 80 ka tuig nga kasumaran sa iyang adlaw’ng natawhan karong Marso 28, 2025, sulod sa selda sa International Criminal Court (ICC), samtang nagpaabot sa iyang Confirmation of Charges Hearing karon’g Septiyembre 2025 sa The Hague, Netherlands.
Sa maong adlaw, magsugod na usab ang kampanya sa mga lokal nga kandidato nga modagan karong umaabot eleksyon sa Mayo 12, 2025.
Gumikan niini, mabahin ang mga kapulisan sa pagbantay sa mga kalihukan nga ipahigayon sa mga kandidato ug sa mga dumadapig ni Duterte tibuok nasod.
Sa Davao, ang prayer rally matod pa ipahigayon sa Rotary Plaza New Corella, Davao del Norte.
Matod ni Brigadier General Jean Fajardo, ang spokesperson sa Philippine National Police, nga nakig-coordinate na ang kapulisan sa Public Safety and Security Office (PSO) sa kagamhanan sa Siyudad sa Davao alang sa paghatag og seguridad sa mga partisipante.
Sa Tagum City, aduna sab ipahigayon nga Global Tribute Rally alang ni Duterte sa Rotary Park sa alas 2 sa hapon.
Human sa rally, ang mga partisipante mag-martsa padulong sa Tagum New City Hall alang sa panapos.
Sa Caraga, Davao Oriental, nanawagan ang Lakbay Mandaya og mga boluntaryo alang sa 24-oras nga Global Peaceful Prayer Rally para kang Duterte nga sugdan sa usa ka Run for Peace and Unity sa alas 5 sa hapon ug sundan sa usa ka hamubo nga programa sa alas 7 sa gabii sa Municipal Park.
Sumala sa grupo sa ilang post, ang kalihukan nagtumong sa pagpalambo sa kalinaw ug panaghiusa samtang nag-ampo alang sa kaluwasan, seguridad, hustisya, ug kaayohan ni Duterte.
Ang mga tigpaluyo ni Duterte sa Lupon, Davao Oriental magpahigayon usab og prayer rally sa Lupon Oval.
Matod sa Facebook post ni Bogick Jak Idol, ang maong kalihukan maglakip sa libreng t-shirt printing ug candle-lighting ceremony.
Dinhi sa Sugbo, ang mga police personnel giandam na aron mapugngan ang mga kasamok tali sa mga dumadapig sa matag kandidato sa nagsingabot nga eleksyon.