Editoryal: Pogo gigamit sa pangespiya?

EDITORYAL
EDITORYAL

Sa usa ka raid sa Philippine Offshore Gaming Operators (Pogo) sa Bamban, Tarlac, grabe og nadiskubrehan ang kagamhanan sa kahimtang sa compound. Dunay mga langyaw nga nagtrabaho nga ilegal. Apan di ni mao ang nakakuyaw.

Nakaplagan sa raid ang mga tunnel ilawom sa pito hektarya nga property. Nasayran usab nga ang mao nga Pogo gigamit sa pagpangespeya ug hacking sa websites. Naa pay luxury vehicles sa sulod sa compound.

Mao ni ang nabalak-an ni Senador Riza Hontiveros ug sa ubang mga opisyal sa kagamhanan tungod kay naa mismo sa atong tugkaran kining sama nga mga pasilidad. Daghan niini duol sa mga Edca site kun mga base militar nga gipagamit sa Pilipinas sa mga Amerikanong sundawo.

Hulga ba sa seguridad sa Pilipinas? Mao ni ang angay nga paladman sa imbestigasyon sa Senado. Kay huna-hunaa lang, sa mga langyaw nga trabahante sa mao nga Pogo compound, 427 kanila mga Chinese national. Bisan tuod kon trabahante sila base sa pasiunang imbestigasyon, di sab kalikayan ang kabalaka nga di sila ordinaryong mga kawani.

Kining kabalaka karon sa mga otoridad dunay mga basehanan sa kasaysayan. Sa wa pa niulbo ang World War 2, nibaha ang mga Hapon dinhi sa Pilipinas, apil na gani dinhi sa Sugbo. Dunay mga negusyante o trader diha mismo sa merkado publiko sa Carbon nga mga military official.

Sulod sa pipila ka katuigan, dinhi na sila namuyo ug nagnegusyo. Nakurat na lang ang Pilipinas sa ilang pagmata sa pagsugod sa pagsulong sa Japan nga ang ilang mga higala, mga sundawo nga Hapon diay. Di lang kay ordinaryo nga mga sundawo, ang uban dagko nga officials.

Naniid na sila daan sa kahimtang ug mga dapit dinhi sa Sugbo busa wa na maglisod ang Japanese Imperial Army sa ilang pagtakas sa Sugbo. Kini nga hitabo sa kasaysayan mao ang gikabalak-an karon.

Duna ra bay ginaingon nga ang kasaysayan masubli. Kana mahitabo kon di kita makakat-on og leksyon kabahin niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph