Human sa pagkapuhag sa Philippine Offshore Gaming Operator (Pogo) hub sa Pampanga, ang Pogo operators nangita og diskarta aron makapadayon sa ilang operasyon.
Ang mga operator sa Pogo, matod sa kapulisan, dunay dakong posibilidad nga gikatag ang ilang operasyon sa suok nga dapit ug ginagmay aron dili dayon masakpan sa awtoridad.
Sama kini sa nahitabo sa shabu o Methamphetamine hydrochloride nga niadto dagkong planta ang nasakpan. Nakadumdom ba kamo sa dakong bodega duol sa Marcelo Fernan Bridge sa Dakbayan sa Mandaue nga gihimong shabu laboratory?
Bisan sa kaulohan, dagkong bodega ang nasakpan kaniadto nga himuanan og shabu. Pero karon, dunay mga balay sud sa mga subdivision sa mga adunahan ang gihimo nga shabu laboratory.
Mao usab kini ang diskarte sa Pogo. Dihang nasakpan na sa kaulohan, ang ubang daling nakabalhin sa lalawigan.
Sa miaging buwan, usa ka hotel sa Barangay Agus, Dakbayan sa Lapu-Lapu nasakpan nga dunay Pogo operation ug kapin sa usa ka gatos nga mga langyaw ang nasikop nga sagad Chinese national.
Ug ning buwana na lang, ang Happy Bear Resort sa Barangay Saavedra, lungsod sa Moalboal gituohan nga gihimong usa sa bag-ong gibalhinan sa Pogo operation.
Kini nga diskarte sa mga ilegalisa gikompirmar ni National Bureau of Investigation (NBI) Director Jaime Santiago niadtong Martes, Oktubre 15, 2024, naglihok karon sa gagmay nga mga grupo aron daling masakpan.
Sa usa ka press conference, si Santiago niingon nga kining gagmay nga mga grupo naglihok sa mga residential unit o apartment.
Gibasehan sa pamahayag ni Santiago human sa pagkasikop sa 17 ka mga langyaw samtang anaa sa ilang workstation sa usa ka residential unit-turned-office sa Makati City. Matod niya, ang mga dinakpan nga nagtrabaho kaniadto sa mas dagkong Pogos giingong nalambigit sa hacking ug crypto scam.
Si Presidential Anti-Organized Crime Commission spokesperson Winston Casio niingon nga base sa ilang monitoring, adunay dul-an sa 100 ka mga illegal Pogo hubs nga naglihok gihapon sulod sa nasod.
Kini ang gikaingon nga paet. Mas lisod nang masignit tungod sa ilang pagbalhin sa ginagmay ug gerilya nga operasyon. Ang awtoridad lang ang gibantayan.
Busa, ning higayona, dako na usab ang matabang sa publiko diha sa pagpaniid sa mga kadudahang lihok sa grupo sa mga tawo sa ilang dapit o komunidad ug kini itaho dayon sa awtoridad.