Editoryal: Politika ug kagubot sa CBRT

EDITORYAL
EDITORYAL

Niluwat og memorandum si Gob. Gwen Garcia alang sa contractor nga nagtrabaho sa Cebu Bus Rapid Transit (CBRT) aron hunungon una kini human mabantayi nga wa diay kini permit sa National Commission on Culture and Arts kay ang Capitol bldg. ug Fuente Osmeña Rotunda mamahimo’ng maisip nga heritage sites.

Makakugang ba kay pipila na ka tuig nga gihisgutan ang proyekto ug gitrabaho na sab kapin na sa tuig, apan karon pa nabantayan. Dako na kaayo og nagasto ug napurhisyo ang publiko unya hunungon na sab kay gikinahanglan ang permit.

Sa kadugay, nataligam-an ning butanga? Karon kay nabantayan ni, hunungon na sab ang trabaho? Nagsige na gani og kalangay ang proyekto, bisan ang pagtangtang sa mga skywalk, unya karon undangon?

Ma-extend na sab ang pag-antos ani sa publiko? Pagkapait ba.

Human nasayod si Mayor Michael Rama sa memorandum sa mayor, nipadayag siya sa iyang kasuko, iya nang gisultihan si Gobernador Gwendolyn Garcia nga di manghilabot sa Siyudad sa Sugbo. Nipadayag sab siya sa iyang kasagmuyo kang Bise Mayor Raymond Alvin Garcia nga nakigtagbo sa gobernador nga wa siya nasayod.

Nisamot pa kay ang bise mayor nag privilege speech nga nagpabor sa paghunong una sa trabaho sa CBRT.

Si Rama dugay nang nipadayag sa iyang kagustohan nga mapaspasan ang trabaho sa CBRT taliwa sa mga kabalaka nga di kini makasulbad sa suliran sa trapiko sa siyudad. Ingon sa nag-inusara sab ang mayor sa pagpabor sa proyekto kay ang uban niyang mga kauban sa Siyudad supak na niini.

Kon undangon ni nga proyekto, kadako na sa kwarta nga mausik. Kon usbon na sab ang desinyo aron di masalipdan ang Kapitolyo ug Fuente Osmeña Rotunda, madugangan og dako ang gasto, mosamot kalangay ang trabaho. Mosangko kini sa dakong alkanse sa gobyerno ug katawhan sa kinatibuk-an.

Tungod sab ning hitaboa, hayan dunay panag-uban nga maputol. Hayan magbadlis sa ilang kandidatura ang mayor ug bise mayor sa 2025 nga eleksyon. Kining hitaboa karon di ni isipon ni Rama nga gaan o ordinaryo lang. Masabot sa iyang gipanulti nga siya nasakitan ug nainsulto.

Di ba kaha hinuon nga tungod sa isyo sa CBRT, magkakontra na hinuon ang mayor ug bise mayor?

Magkinaunsa man ang relasyon sa mga politiko, di karon maayo ang pagpahunong sa trabaho sa CBRT nga nasugdan na. Basin madugangan na sab og bilyunes ka pesos ang proyekto.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph