Bisan nga bag-uhay pa lang natapos ang midterm elections ug layo pa ang 2028 election, apan adunay nanggawas nga tabi-tabi nga si Tingog Party-list Representative Yedda Romualdez nagtinguha nga magpapili pagkagobernador sa Lalawigan sa Sugbo.
Dali nga nakaluwat sa iyang opisyal nga pamahayag si Romualdez aron sa pagklaro sa maong isyu.
Iyang gipahibalo nga wa siyay interest nga magpapili pagkagobernador o sa bisan unsa nga posisyon sa Sugbo.
Aron sa pagmatuod, wala siya mobalhin og rehistro sa Cebu.
Ang gihimo ni Romualdez nga niluwat gilayon og opisyal nga pamahayag nga naghatag og katin-awan aron sa pagputol sa espekulasyon ug sa tabi nga way igong basehanan.
Kon basehan ang pamahayag ni Rep. Yedda Romualdez, iyang gitan-aw ang politika nga pagpanerbisyo ug dili duwa sa gahum.
Sa kalibotan nga daghan pa gihapon ang nalumos sa politika sa personalidad, nepotismo, ug posisyon sa usa ka partido, ang iyang baruganan nagpakita og katin-awan, pamatasan, ug professionalism.
Sa pag-ingon niya nga “If ever you see my name on the ballot in Cebu, huwag n’yo akong iboto — because that would not be me,” usa kini ka pagmatuod nga adunay integridad.
Hagit sab ngadto sa publiko o botante nga magmatngon ug motan-aw sa tinuod nga intensyon sa ilang mga lider.
Kini nga kahimtang usa ka pagpamalandong nga angayan ipahinumdom sa tanang opisyal ug katawhan: ang tinuod nga lider dili magpanuko sa pagbatok sa sayop nga estorya ug dili mosayaw sa duyog sa tsismis alang sa katagbawan sa ambisyon.
Sa panahon nga ang tinuod ug sayop sagol na sa politika, ang kamatuoran angay ipaabot sa mas klaro nga baruganan.
Ang katawhan dili angay mobukat na lang sab sa habol sa kasikas sa tsismis ug hungihong.
Angay nga sa usa ka lider nga adunay igong pagtahod sa ilang mandato, ug mohunong sa mga pulitikanhong interes.
Ug hangtod nga ang tinuod nga serbisyo publiko maoy mopatigbabaw, sa maong paagi makab-ot sa nasod ang tinuoray nga kalambuan nga way nagpahipi nga personal nga interes.