Editoryal: Problema sa pagkaadik sa sugal

Editoryal: Problema sa pagkaadik sa sugal
Editorial Cartoon by Ariel itumay

Na-shock ang kapulisan ug publiko human nitumaw sa imbestigasyon sa Toledo Police Station nga ila ra sab diay nga kauban ang suspek sa pagtulis sa sanga sa usa ka kooperatiba sa Toledo City niadtong Biyernes sa buntag, Enero 12. Ang dagan sa imbestigasyon ug nakuha nga mga ebidensya nipadulong ngadto kang Patrolman Jaymar Exequiel.

Nilutaw sa imbestigasyon nga daghan og utang ang mao nga polis human kini giingong nabuang sa e-sabong. Kini nga matang sa online game usa sa gikabuangan sa mga mahiligon og sabong, apil na ang pipila ka mga sakop sa Philippine National Police.

Makita ang ka popular niini human ningtumaw sa daghang mga dapit sa nasod ang mga e-sabong booking stations nga gipasirhan dayon ni kanhi Presidente Rodrigo Duterte human sa mga sabongero nga nanga-missing human gipang-kidnap, ang uban giadto pa sa ilang balay.

Duna pay mga polis karon nga gipangkiha tungod sa pagkalambigit nila sa mga missing sabongero.

Pipila sa mga polis nga nangalambigit sa krimen nasuta nga nabuang diay sa e-sabong. Kon tinuod man ang nakuha nga impor­masyon sa mga imbestigador sa Toledo po­lice, angay ning hatagan og pagtagad sa Phi­lippine National Police (PNP).

Di hinuon common ang pagkaadik sa sugal kon itandi sa ilegal nga sugal. Apan bisan pa, namatud-an nga magtukmod kini kanila sa paghimo og mga ilegal o paghimo og di maayo sa ilang kaugalingon, sama sa nahungihong nga hinungdan sa paghikog sa pipila ka mga polis nga mao ang dagkong utang tungod sa online illegal gambling, labina sa e-sabong.

Gamiton unta sa PNP ang in-house intelligence gathering kinsa sa ilang mga ginsakpan ang nagumon sa illegal gambling aron matabangan. Usa kini ka suliran sa kahimtang sa panghuna-huna nga nagkinahanglan og abag gikan sa usa ka psychologist o psychiatrist.

Kay kon pasagdan kini nga suliran, bisan pipila lang tuod, makamansa kini sa imahe sa kapulisan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph