Dili lang diay Cebu City Hall ang ablihan 24 oras matag adlaw, kon dili apil na sab ang Cebu City Public Library (CCPL) sa may Osmeña Boulevard, Dakbayan sa Sugbo sa higayon nga molingkod na sa iyang katungdanan si Mayor-elect Nestor Archival.
Basin ablihan na sab pagbalik 24 oras ang Cebu City Sports Center alang niadtong hilig mag-jogging.
Ang CCPL nagsugod og abli 24 oras matag adlaw niadtong Marso 9, 2018, sa panahon ni kanhi Mayor Tomas Osmeña kinsa nidaog pagka-bise mayor ni Archival sa miaging eleksiyon sa Mayo 12, 2025. Niadtong tungora, giila ang CCPL nga bugtong library sa tibuok Pilipinas nga ‘way tulganay.’ Apan ang maong serbisyo nahunong niadtong tuig 2020 atol sa Covid-19 pandemic.
Sukad niadto wala na kini nahibalik. Sayang lang tungod kay daghan nga mga estudyante ang makabenepisyo niini.
Imbes nga adto sa internet cafe o coffee shop maghimo sa ilang research, adto na ang mga estudyante sa public library nga ilang magamit nga libre.
Hinuon, adunay snack bar ang CCPL diin ang mga estudyante pwedi ra mopalit og pagkaon apan dili sila obligado nga mopalit.
Dili sama sa coffee shop nga makagasto gyud ka kay dili man ka pwedi nga mogamit sa ilang table nga way paliton.
Human sa public library, nisunod sab pag-abli 24 oras matag adlaw ang Cebu City Sports Center (CCSC) niadtong Abril 5, 2018, ubos sa kamanduan ni kanhi Mayor Tomas Osmeña alang niadtong mga trabahante sa call center ug uban pang kompanya nga mogawas sa ilang trabaho sa gabii nga gustong mag-jogging.
Kon wala lay mga kakulian nga makabalda sa mga plano sa umaabot nga administrasyon ni Mayor Archival og Bise Mayor Tomas Osmeña, hayan makahatag kini og kaayohan alang sa mga lumolupyo sa siyudad.
Sama pananglit sa City Hall diin pwedi na ang mga kliyente nga mobayad og buhis ug uban pang mga transaction niini bisan lapas na sa 8-5 p.m. nga oras sa opisina.
Kadtong mga tawo nga nagtrabaho sa 8-5 p.m. nga schedule sama sa office hours sa gobiyerno, pwedi na nga moadto sa city hall inig kagabii o sa kadlawon.