Sa miaging buwan, daghan ang mga isyo nga ningtumaw sa social media batok sa mga modernong public utility vehicles (PUV) tungod sa giingong pangabuso sa mga drayber.
Dunay bata nga naangol kay nagpaturagas lang sa pagpadagan ang usa ka drayber sa PUV nga magbiyahian sa Lahug. Mga pasahero gipakanaug sa usa ka drayber sa taliwala sa flyover sa Mambaling kay dunay nanakop sa unahan sa mga sakyanan nga overloaded.
Naa say ubang drivers ani nga mga sakyanan nga mas maisip nga mini buses, nga maglumba sa pagpadagan. Sa laktod, moderno ang sakyanan kay bag-o, apan karaan gihapon ang mentalidad.
Di ni malikayan kay kini nga mga drayber gikan ra usab sa karaan nga mga PUJ nga gipahunong na sa pagbiyahe. Sa ato pa, sakyanan ray bag-o, apan ang batasan sa mga drayber nagpabilin.
Apan nipasabot ang pederasyon sa mga kooperatiba sa transportasyon sa Sugbo kon ngano nga dunay mga drayber nga mag-overloading. Diay, ubos ang ilang kitaon, maglisod sa pagkuha sa “boundary” nga P7,000 kada adlaw tungod sa grabeng kahuot sa trapiko.
Inay nga makakuha og pito ka round trip matag adlaw, naa na lang sa upat ngadto sa lima. Kon minos ang round trip, minos usab ang kita. Maglisod sila sa pagbayad sa ilang gi-loan sa pagpalit sa mga sakyanan.
Balido kaayo ang mao nga isyo. Tinud-anay diay ang kahadlok sa mga operator ug drayber nga nanghangyo sa kagamhanan nga lugwayan ang pagpatuman sa modernisasyon.
Una, sulbaron una kining nagkagrabe nga kahimtang sa trapiko. Kini nga problema hanap pa kaayong masulbad. Apan tingali, sa ikaduha, nga mao ang pagpangita og mas barato nga tinubdan sa mga sakyanan o mini buses, mas makasarang ang mga transport group sa datahan. Mas maayong dugangan pa sa kagamhanan ang kantidad nga i-subsidize sa matag sakyanan nga paliton sa kooperatiba.
Maanindot ang modernisasyon kay hamugaway ang mga sakyanan. Apan kon ang batasan sa mga drayber kinaraan gihapon tungod sa giapas nga kita, sama ra sa nakawang ang katuyoan niini.