Hanap na nga makadagan pa karong umaabot eleksyon sa Mayo si kanhi Cebu City Mayor Michael Rama human gibasura sa Ombudsman ang iyang motion for reconsideration nga gisang-at alang sa iyang dismissal order.
Gawas niini, dili na makadawat ang kanhi mayor sa iyang retirement ug dili na siya makakupot og bisan unsang posisyon sa gobiyerno hangtod sa hangtod.
Apan kay na-print na man sa Commission on Election (Comelec) ang mga balota ug naapil ang ngalan ni Rama isip kandidato pagka mayor sa dakbayan, dili kaha kini makapalibog sa mga botante?
Unsa kahay maayong buhaton sa Comelec ani, butangan kahag erasure mark ang ngan ni Rama aron dili maapil og botar o as-is na lang ang balota apan adunay risgo nga maapil og botar kay nalipat ang mga botante?
Ang tubag ani mahibaw-an nato kon moluwat na og pamahayag ang Comelec Central Office.
Matod ni Comelec Region 7 director Franciso Pobe nga ang Comelec Central Office ra ang makatubag kabahin sa kandidatura ni Rama.
Ang pagkataktak ni Rama naggumikan sa iyang kaso nga nepotism diin duha ka igsuon sa iyang ikaduhang asawa nga si Malou nga sila si Elmer ug Gomer Mandanat, ang giingong gipasulod og trabaho sa City Hall.
Niadtong Enero 15, 2025, gibasura sa Ombudsman ang apela ni Rama nga balihon ang hukom niini nga giluwatan niadtong Septiyembre 9, 2024, diin napamatud-an nga sad-an siya sa pagtudlo sa iyang mga bayaw sa mga posisyon sa lokal nga kagamhanan nga nakalapas sa balaod sa civil service.
Si Rama nangatarungan nga dili siya ang nipili sa appointees, kondili ang Human Resource Development Office (HRDO) maoy nihatag og gibug-aton sa ilang mga kwalipikasyon ug gi-review usab kini sa accounting ug budget management offices sa wala pa kini moabot sa iyang lamesa.
Apan gisalikway sa Ombudsman ang iyang mga argumento nga niingon nga isip mayor, si Rama maoy naay direktang responsibilidad sa mga gipangtudlo.
Basi sa record sa HRDO, si Elmer nitrabaho isip process server sa Office of the Mayor, unya si Gomer na-assign sa Cebu City Medical Center isip administrative aide.
“These brothers-in-law of mine have been in the city hall as employees even before the previous administrations,” matod sa kanhi mayor.