Editoryal: Re-blocking ug politika sa barangay

Editoryal: Re-blocking ug politika sa barangay
File photo

Si Cebu City Mayor Michael Rama nipahibawo sa panginahanglan sa re-blocking sa mga dapit nga nanginahanglan niini taliwa sa sunodsunod nga mga sunog nga niigo sa dakbayan sa nakalabay nga mga buwan.

Ning unang duha ka mga buwan sa 2024, upat na ka mga kinabuhi ang nangakalas tungod sa sunog.

Tungod niini, si Rama niingon nga dunay i­pahigayon nga mga re-blocking.

Bitaw, di na kinahanglan pang huwaton nga mahitabo ang sunog una pa ipahigayon ang re-blocking. Di na huwaton pa nga dunay makalas nga kinabuhi kay wa bayay presyo nga makatumbas niini, bisan pa ang minilyon ka pesos nga gastuhon sa kagamhanan.

Sa sunog diin nangamatay ang upat ka mga sakop sa usa ka pamilya, naglisod ang mga bombero sa pagkombate sa kayo tungod sa kalisod sa agianan.

Naangin pa ang usa ka establisemento sa negusyo nga di unta maabot sa sunog tungod apan duna diay mga namuyo sa ilang likod nga maisip nga illegal settlers apan way nakabadlong kanila, napasagdan sulod sa katuigan.

Dinhi makapangutana ka kon unsay gibuhat sa mga barangay official, naghimo ba sila sa ilang mga gimbuhaton ug tahas alang sa barangay? Naghuna-huna tingali sila nga ang mao nga mga tawo, nga huyang kaayo nga sektor tungod sa ilang kahimtang sa kinabuhi, mamahimong mga armas sa panahon sa eleksyon.

Sa laktod, political tool nga ilang magamit sa panahon sa eleksyon. Mas dako ang voting population, mas gamhanan ug impluwensyal ang barangay officials.

Busa maanindot ni ang pagpangusog ni Rama sa re-blocking sa mga barangay nga maghuwat sa mga sunog.

Sa tanan baya sab nga mga local chief exe­cutive sa Cebu City, siya ra ang grabe kaaktibo ani nga proyekto. Sumala gud ang Brgy. Lorega nga grabe ang kahagip-ot ug kadasok sa mga balay, karon makaginhwa ka na tungod kay duna nay klaro nga mga karsada.

Hinaot pang ang barangay officials magbuhat sa ilang tahas sa pag-monitor sa ilang dapit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph