Editoryal: Rehiyon VII mokampyon kaha sa Palaro?

EDITORYAL
EDITORYAL

Taliwala sa mga kakulian nga naagian ka­la­bot sa pagpangandam, makonsiderar nga nagmalampuson gihapon ang Dak­ba­yan sa Sugbo sa pag-host sa 2024 Central Visayas Regional Athletic Association (CVIRAA) Meet nga nitiklop niadtong Mayo 9 sa G Mall of Cebu.

Sama sa gilauman, ningdominar ang Cebu City Niños sa kompetisyon nga gikombatihan og dul-an sa 11,000 ka estudyanteng mga atleta gikan sa 20 ka nagkalainlaing mga delegasyon sa Rehiyon VII.

Nakalabni ang Niños og 118 gold, 73 silver ug 78 ka bronze medals.

Ang gold medal winners sa CVIRAA mao lang ang makarepresentar sa rehiyon alang sa Palarong Pambansa gawas lang sa measurable events sama sa swimming, athletics ug archery nga adunay kaugalingong standard qualification.

Unsa kaha kaandam ang mga atleta nga morepresentar sa CVIRAA sa 2024 Palarong Pambansa, nga i-host sab sa Dakbayan sa Sugbo karong Hulyo 6-17?

Aduna pa’y duha ka mga buwan nga maka­pangandam ang mga atleta sa Rehiyon VII alang sa mas lisod nga kompetisyon.

Kining maong mga atleta nagkinahanglan og dakong suporta sa nagkadaiyang aspeto aron ilang mahatag og balik sa Rehiyon VII ang overall title sa Palarong Pambansa.

Hinaot nga mahatagan kini og pagtutok sa Department of Education (DepEd)-7 ug Cebu City Sports Commission (CCSC).

Puwede tingali mokablit og suporta ang duha ka mga ahensya gikan sa pribadong mga sektor aron mahatag ang tanang mga gikinahanglan sa estudyanteng mga atleta sa CVIRAA.

Giingon nga katapusang nahimong overall champion ang Rehiyon VII sa Palarong Pambansa niadto pang 1994 atol sa labing ulahing pag-host sa Dakbayan sa Sugbo sa matag tuig nga kompetisyon.

Mao kini ang bugtong higayon nga nakuha sa CVIRAA ang overall title sa prestihiyusong kompetisyon. Kon abunda sa suporta ang mga atleta sa CVIRAA, dili halayo ang posibilidad nga makuha pagbalik niini ang overal title ning tuiga.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph