Editoryal: Rota sa SRP

EDITORYAL
EDITORYAL

Kon dunay rota sa publikong sakyanan sa South Pro­perties (SRP), segurado nga mas mopaspas pa ang paglambo sa ekonomiya sa dapit.

Apan ang dakbayan sa Sugbo wa pa makasumiter sa Local Public Transport Route Plan (LPTRP) ngadto sa buhatan sa Land Transportation Franchising ang Regulatory Board (LTFRB) tungod sa daghang rason.

Usa niini ang wala pa mahuman nga Cebu Bus Rapid Transit (BRT) project nga dako og impluwensiya sa plano nga rota busa walay hingpit nga nalatid nga LPTRP sa pagkakaron.

Ang modern public utility jeepneys (MPUVs) nagdagan karon base sa temporary o special permit. Daghang units sa MPUJ ope­rators ang nagpundo tungod sa way tino nga rota o maalkanse sa rota nga subra ang publikong sakyanan.

Ug paborable sa MPUJ operators ang plano ni Cebu City Ma­yor Michael Rama sa pag-abli og temporaryo nga rota sa SRP, nga matod pa, sa pagtubag unya sa demanda nga kasakyan sa publiko sa Palarong Pambansa karong Hulyo ning tuiga.

Kuwang kaha ang transportasyon sa Central Visayas Regional Athletic Association (CVIRAA) diin ang ubang venue sa events naa sa SRP? Dili ba igo ang free rides sa dakong mall sa SRP ug ang mga sakyanan gikan sa dakbayan?

Apan sumala sa mga taho, ang renobasyon sa Cebu City Sports Center (CCSC) mahuman na sa dili pa ang maong dakong nasudnon nga kalihokan sa paugnat-sa-kusog sa Hulyo.

Busa gilauman nga mas matapok na unya sa CCSC ang mga duwa atol sa Palarong Pambansa, sukwahi sa katag nga venue sa CVIRAA karon.

Apan maayo ang plano sa mayor sa pag-abli og rota sa SRP, ubos sa pagtugot sa LTFRB, dili tungod sa Palarong Pambansa, labaw sa tanan, ang pagsuporta sa pagtuyok sa ekonomiya sa dapit.

Kon mokita ba ang MPUJ sa maong rota, dako pa kini nga pangutana sa pagkakaron. Di pa daghang estabilisemento nga pangmasa sa maong dapit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph