Nagpadayon ang alegre nga tinubagay sa mga opisyal ug mga inilang personahe bahin sa Cebu Bus Rapid Transit (CBRT) project sa dakbayan sa Sugbo.
Unang hugna o package 1 pa ang gitrabaho gikan sa Kapitolyo sa Osmeña Blvd. ngadto sa Cebu South Bus Terminal (CSCT) sa N. Bacalso Ave., nag-aso-aso ang daghang isyo, pangutana ug kontrobersiya.
Ang CBRT dunay upat ka packages. Kon kini nga sitwasyon magpadayon, unsa na lang kaha ang mosunod nga tulo ka packages sa proyekto?
Dili tiaw ang mga personahe nga naningog sa ilang giingong pagpakabana. Ang Sangguniang Panlalawigan (SP) nipalabang og duha ka mga resolusyon.
Una, ang pagpaghunong sa trabaho sa bus terminal nga way permiso sa pag-ugmad duol sa heritage site. Ikaduha, ang pagpahunong sa kinatibuk-ang proyekto.
Si Mayor Michael Rama una nang niawhag kang Cebu Gob. Gwendolyn Garcia nga dili manghilabot sa proyekto sa dakbayan.
Nihulga usab ang mayor nga mokiha sa tanang ninghimo og aksiyon sa pagpahunong sa CBRT project.
Ug si kanhi Mayor Tomas Osmeña nitingog nga ang Osmeña Blvd. ug ang parte sa luna sa Kapitolyo gipanag-iya sa ilang pamilya human giingong ‘wala mahinayon ang swap deal’ niadto sa iyang amahan tali sa Kagamhanan sa Lalawigan.
Nihulga si Osmeña nga modangop sa korte sa pagbawi sa luna kon magpadayon si Garcia sa iyang pagbabag sa CBRT nga unang naumol ug naapruban sa administrasdyon sa kanhi mayor.
Apan sa press conference niadtong Miyerkules, si Garcia nipadayag ug nipatigbabaw nga ang Kagamhanan sa Lalawigan maoy nanag-iya sa Osmeña Blvd. ug tibuok luna sa Kapitolyo.
Dili ba bangga gyud? Dili kita mohukom ug modapig, mas maayong mapatin-aw pinaagi sa pagsang-at sa isyo ngadto sa korte.
Utro usab ang Department of Transportation (DOTr). Nipagawas og pamahayag nga dili moluwat og komentaryo ang ‘way labot’, lakip sa media, nga matod pa, usa kini ka proyekto sa nasudnong kagamhanan.
Medyo makatandog. Mura og tuno sa ‘imperial Manila’? Naa sa atong dapit ang proyekto ug labaw sa tanan, buhis nato ang gigasto o gibayad sa utang sa CBRT. Takos kita nga magpakabana.
Nganong daghang nagkalahi-lahing komentaryo? Dili tungod lang usab sa DOTr? Di sihag o transparent sa ilang pagdumala sa proyekto. Bisan si Rama nikuwestiyon sa way tino nga koordinasyon bahin sa trabaho.
Unsay gusto sa DOTr, himuong robot ang katawhan? Moyango lang ug motulon sa ilang ihungit kanato? Magmata kitang tanan.
Way kwestiyon sa kaayuhan sa proyekto sa CBRT, bisan nalangay kini, apan ang way tarong nga komunikasyon, koordinasyon ug kolaborasyon.
Ngano kaha? Ang proyekto balor baya og kapin sa P28 bi1yunes. Dili na lang dugayon ang kasaba, korte na makita.