Bisan kinsa ang pasultion, komplikado o gubot pa sa lukot ang nag-unang mga isyo sa dakbayan sa Sugbo ubos sa pagpangulo ni Mayor Michael Rama.
Sa yano nga pagtan-aw, dili kini lalim nga sitwasyon ug hagit sa administrasyon apan wa mapiog si Rama sa pag-asdang sa iyang baruganan.
Kini sama sa kontrobersiya bahin sa Bus Rapid Transit (BRT) project, bangi sa Cebu Port Authority (CPA), ug Metropolitan Cebu Water District (MCWD).
Gubot ang dagan sa mga panghitabo labi na sa MCWD nga niabot na sa pisikal nga lihok. Sa pikas bahin, dunay positibo nga kalamboan mugna sa kainit sa isyo.
Una sa tanan, napaklaro ang walay klaro nga paghubad sa balaod. Dili kaha ang balaod mismo dunay buslot?
Kon wala mosungag sa iyang baruganan si Rama, dili mawiwi ang mga buslot sa balaod ug mga limitasyon sa gahom, sama sa isyo sa MCWD.
Napaklaro kon unsay papel sa mayor ngadto sa MCWD. Mas nasabtan na usab unsay responsibilidad sa Local Water Utilities Administration (LWUA) ngadto sa water districts.
Sa CPA, tungod sa bangi nga niabot na sa korte, gilauman nga hinayhinay nga mapasabot kon unsay ‘hubad’ sa iyang pagkaindepedente tali sa lokal nga kagamhanan diin siya nahimutang.
Lakip kontrobersiyal nga BRT nga gipatuman ubos sa Department of Transportatiion (DOTr). Tungod sa daghang mga pangutana, mabasehan kini sa pag-umol og polisiya sa ilang pagpatuman sa proyekto sa lokal nga kagamhanan.
Sa nabitabo sa BRT, mitumaw nga way tino ang koordinasyon sa lokal nga kagamhanan bahin sa pagpatuman sa proyekto sa nasudong kagamhanan.
Kon wala pa motumaw ang kagubot, dili kini makita nga ‘bikil’ sa balaod hinungdan sa nagkalainlain ang hubad o interpretasyon.
Usa kini sa mga postibo nga aspeto sa pagtan-aw taliwala sa kagubot sa sitwasyon.