Hinaut nga tinuod ang saad sa SBD Builders nga ilang mahuman ang pagmuntar sa rubberized oval sa Cebu City Sport Center (CCSC) sa dili pa ang gikatakda nga pag-abot sa mga delegado sa Hunyo 28 alang sa 2024 Palarong Pambansa nga moabli karong Hulyo 6.
Si John Pages, chairman sa Cebu City Sports Commission, nahinabi sa media sa Lunes, Hunyo 10, nibutyag sa maong saad sa kontraktor uban sa pasalig nga dunay ‘warranty.’
Sa kaapiki sa pagkahuman sa rubberized oval, may igong panahon pa kaha sa pagsusi sa kalidad? Mas masuwayan una gamiton. Kwestiyonable na daan bisan dunay warranty.
Unsa ning warranty? Pila ka buwan o tuig human sa trabaho? Lain na usab nga pagsira sa CCSC kon ugaling dunay kadaut sa oval? Pagka way klaro.
Usa na ka tuig ang pagsira sa CCSC apan karong apiki sa panahon nagdali-dali sa trabaho. Dakong kwestiyon usab sa SBD Builders, unsa kahay ilang kapasidad? May igo ba nga pundo? Nganong nipasar sa pag-apil sa bidding?
Bisan unta kon wa pa ma-release ang pundo sa kagamhanan, ang sagad sa mga kontraktor nga modaug sa bidding nga dunay igong kapasidad magsugod na sa trabaho gamit ang ilang pundo.
Kon nakadaug ang usa ka kontraktor sa proyekto sa kagamhanan ubos sa ‘mapanganuron nga kahimtang’ ug ang hinayhinay nga pag-release sa pundo sa proyekto maoy gisaligan, aw, paet.
Hinaut nga dili kini ang sitwasyon sa SBD Builders pero, angay nga ang atong mga opisyal mosusi sa agi sa ilang ubang proyekto aron masabtan usab nato ang nahitabo sa rubberized oval sa CCSC.
Dakong tanghaga ang renobasyon sa CCSC. Apan di nato matumbok dayon kon adunay kurapsiyon. Apan daghang rason, bisan unsa na lang ang gipasanginlan sa kalangay. Ang importante na lang karon, ang saad sa SBD Builders dili mapakyas.