Makapainteres ang nagpadayong hilig sa uban nga sabong sa kaka. Dili lang bata, lakip na sa mga hamtong malingaw. Apan ang nakalahi sa naulahi mao nga kusog ang pustaanay og dagkong kantidad diin nakahimong ilegal sa maong matang sa sabong.
Ug niadtong Lunes sa gabii, Septiyembre 23, 2024, dunay 42 ka mga tawo ang nangasikop sa sakop sa Parian Police Station 1 nga naaktohan nga nagsugal og kaka sa Sitio Lawis, Barangay Lorega San Miguel, Siyudad sa Sugbo.
Si Police Major Marvin Fegarido, hepe sa Parian Police Station, niingon nga nakadawat sila’g tawag gikan sa 911 national hotline nga dunay nagsugal sa kaka sa maong lugar.
Sama sa nagpista ang mga sugarol sa lugar, matod ni Fegarido, saba kaayo sa sininggitay kung magsugod na nga ang pinaakay sa mga kaka, tungod ani usa sa mga residente ang mitawag sa hotline. Dali nila nga girespondehan ug ilang naabtan ang mga sugarol nga nagpaaway sa Kaka diin silang tanan nasurprisa sa presensya sa mga polis ug wala maka dagan nga tungod ani ang 42 naposasan.
Nasakmit sa mga polis ang upat ka improvised small boxes nga dunay sud nga 32 ka buhing kaka lakip na ang improvised spider fighting arena ug kwarta nga mokabat sa P2,470.
Unsay ilang kaso? Sa madumdoman lang, way balaod nga nagdili sa away kaka. Dili usab pwede bahin sa animal cruelty nga kawsa sa mga animal rights activist human insekto ang kaka, dili animal. Busa, ang mga dinakpan maigo seguro sa balaod batok sa ilegal nga sugal. Kon daghang nagkainteres niini, maayong kontrolahon na lang pinaagi sa ordinansa o balaod bahin sa sabong sa kaka? Sama sa buwang o sugal sa manok, nganong dili mahimo sa kaka?
Dili na magtagotago ug makatabang pa hinuon kini sa panudlanan sa lokal nga kagamhanan. Gawas pa, ang kaka, bisan kini dunay iyang papel sa pagbalanse sa eco-system, apan dili ingon kabug-at gani silhigon lang labina sa pagpanglimpiyo sa panimalay.
Apan mas mahimo kining dakong problema kon dili makontrolar ug way lagda nga sundon sa sugal sa kaka. Labi na kon kwarta ang maghari sa duwa, mas init kini nga posibleng hinungdan sa krimen.