Editoryal: Sama og lungag sa dagom ang no permit, no exam

EDITORYAL
EDITORYAL

Gipirmahan ni Presidente Ferdinand Marcos Jr. ang Republic Act 11984 kun “No Permit, No Exam Prohibition Act” niadtong Marso 11, 2024.

Apan di sayon alang sa usa ka tinun-an o hayan ginikanan, ang pagpahimulos niini kay gikinahanglan pa ang pagkuha og serti­piko gikan sa social welfare office sa siyudad o lungsod, o mismo sa Dept. of Public Social Welfare and Development aron pagmatuod nga siya naa sa “disadvantaged status.”

Kini tungod sa nagkadaiyang mga rason sama sa kalamidad o natural nga mga hitabo nga di malikayan o kapugngan ingon man emerhensya.

Gituyo ni sa kagamhanan nga di sayonsayunon ang pagkuha niini nga sertipiko ingon man mga hinungdan tungod kay posible kaayo ni nga abusohan ni bisan kinsa.

Daghan tingali ang mangutana kon nganong lisodlisuron man ang mga tinun-an sa pagkuha og certificate? Ang pag-angkon niini di katungod, kon di prebilihiyo nga ihatag sa estado ngadto sa mga tinun-an nga tinud-anay nga temporaryo nga naa sa kalisod busa maglisod sa pagbayad.

Ang balaod usab wa nagdili sa mga tunghaan sa pagdawat og promissiory note, sa pag-hold sa mga dokumento sa mga tinun-an nga wa nakabayad sa gikinahanglan nga bayran.

Klaro nga sa exams lang pwede magamit ang certificate, wa giapil ang pagkuha sa ubang mga dokumento, sama sa transcript of records human mograduwar sa college ug usahay gikinahanglan sa pag-apply og trabaho.

Sa laktod nga pagkasulti, taliwa sa mga limitasyon nga gilatid sa balaod, pipila lang ang makapahimulos niini. Kadtong tinud-anay nga naa sa tumang kalisod seguradong maninguha sa pagkuha niini bisan di sayon ang rekisito sa mga sirkumstansya.

Kay ang mga buhatan nga hingtungdan seguradong mangita sab og mga dokumento aron pagmatuod sa kahimtang sa usa ka tinun-an.

Wa gibuhat ang balaod nga sayon alang ni bisan kinsa nga mopahimulos. Gihatag ang prebilihiyo sa naglisod nga mga tinun-an, apan gipanalipdan usab ang katungod sa mga tunghaan. Lisod baya kon abusohan kay karong panahuna, daghan usab ang mga binuang.

Total, sagad sa mga tunghaan dunay mga polisiya nga mahimo rang makakuha og exams ang mga tinun-an kon makakuha og promissory note gikan sa school administration.

Kon nahimo kaniadto ang pagkuha og exams nga gipaagi lang sa saad, nganong di man karon? Ang balaod nga gipasar magamit lang kon piit na kaayo ang mga ginikanan ug tinun-an.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph