Ning panahon sa balaang semana o mas naila nga Semana Santa, magkahiusa ang mga Katoliko sa pagpamalandong sa kamatayon ug pagkabanhaw ni Hesus.
Linibo ka mga tawo ang magkatapok agi’g pagsunod sa tradisyon, debosyon, ug espiritwal nga kalihukan.
Basta baya adunay bagang hut-ong sa katawhan nga magkatapok – sama sa pagsalmot sa mga prosesyon, Bisita Iglesia ug uban pa nga relihiyusong mga kalihukan – hayan mosiaw sab dayon kining mga badlungon sa katilingban.
Niini, gikinahanglan ang presensya sa kapulisan, mga tanod, ug uban pang law enforcement agencies aron makabantay sa kalinaw ug kahapsay. Wala gyud baya'y ilhon nga panahon ang mga badlungon, kon adunay kahigayunan, mohamag dayon kini sa dautan nilang intensyon.
Labing seguro, nangandam na ang mga awtoridad ning panahuna.
Apan angayang hunahunaon sa matag tawo nga bug-at nga responsibilidad ang gipas-an sa mga awtoridad ug nagkinahanglan sila og suporta sa katilingban.
Ang yanong pagbantay sa kaugalingong mga gamit, paglikay sa mga lugar nga delikado ug pagsumbong kon adunay mabatyagan nga kadudahang mga tawo makatabang na’g dako sa mga awtoridad sa pagbantay sa kahapsay ug kalinaw.
Kon magtinabangay ang usa’g usa, maseguro nga ang pagpamalandong sa Semana Santa magpabilin nga malinawon, luwas, ug matuman ang espiritwal nga katuyoan niini. Busa alerto, katilingban.
Oplan
Biyaheng Ayos
Dalaygon kining inisiyatibo sa Land Transportation Office (LTO) Region 7 nga pag-deploy sa ilang mga kawani sa dagkong terminal ug pantalan sa Central Visayas pinaagi sa “Oplan Biyaheng Ayos: Semana Santa ug Summer Vacation 2025.”
Maayo kini nga lakang hilabi na ning semanaha nga seguradong magdasok ang mga tawo sa mga terminal ug pantalan nga manguli sa probinsya.
Ang presensya sa mga kawani sa LTO 7 makatabang og dako aron mahapsay ug mapalambo ang sitwasyon sa pampublikong transportasyon.
Subay niini, ang LTO 7 mopahigayon og visual ug random roadside inspections, mga lakang nga makatabang aron mapugngan ang posibleng disgrasya sa kadalanan.
Mapugngan sab niini ang mga kolurom o ilegal nga mga sakyanan nga mag-operate nga walay prankisa.
Ang “Oplan Biyaheng Ayos” dili lang kampanya sa LTO apan usa sab kini ka panawagan alang sa tanan—mga drayber, operators, ug pasahero—nga magtinabangay alang sa luwas, hapsay, ug haruhay nga pagbiyahe.
Kudos ngadto ni LTO 7 Regional Director Glen Galario ning inisiyatibo alang sa biyaheng ayos.