Editoryal: Silhigon mga adik sa gobyerno

EDITORYAL
EDITORYAL

Sa pipila ka mga random drug testing sa Dakbayan sa Lapu-Lapu sa iyang mga kawani, dunay nakaplagan nga drug users. Gipangtaktak dayon ang mga nahisakop sa job order samtang ang uban nga lain og employment status gisusi sab aron hukman kon taktakon ba o di.

Maayo kaayo nga gihimo ni ang random drug testing nga gipaagi na og ordinansa sa Siyudad kay mamahimo na kini nga naandan sa mosunod nga mga administrasyon.

Sa ilang ordinansa, dunay mga kawani nga ipailawom sa random drug test sama sa sige og ka late, magsige og absent ug tapulan sa trabaho, labina adtong dunay panagway nga sama og adik.

Importante kaayo nga way durugista sulod sa kagamhanan kay way drug user nga maayo og pangutok, mosimang gyud ni. Salikwaot kaayo nga ang kagamhanan mokampanya batok sa illegal drugs apan dunay mga drug user o durugista sulod sa ilang poder. Labina gyud kon sulod sa mga law enforcement agency.

Bisan mga hungihong lang, angay nga aksyunan dayon sa hingtungdang buhatan ang pagpailawom sa drug test sa ilang kawani. Kay sagad, di lang na estorya, dunay katinuoran. Sagad, kon dunay aso, duna gyuy kayo. Angay usab tingali nga manubag ang immediate nga dako sa usa ka kawani nga dugay nang naggamit sa drugas apan way gihimo nga aksyon ang dako sa buhatan.

Labina gyud kon motumaw sa imbestigasyon nga gitabunan ang sala sa mao nga kawani.

Sa Dakbayan sa Lapu-Lapu, masabot ang kahingawa ni Mayor Junard “Ahong” Chan tungod kay dunay kawani nga gilambigit sa pagpatay sa usa ka opisyal. Nasuta sa background check sa kapulisan nga nalambigit kini sa illegal drugs.

Kon nahitabo kini sa Lapu-Lapu, di sab layo nga sa ubang mga local government unit (LGU) naa sab kini. O bisan gani sa rehiyunal nga mga buhatan sa kagamhanan. Busa, hinaot nga di lang Lapu-Lapu ang mohimo og samang lakang, angay ni sundon sa ubang mga LGU aron hingpit nga malimpyuhan ang kagamhanan gikan sa hulga sa ilegal nga drugas.

Namatud-an na man gud nga bisan asa nga institusyon, pribado man o gobyerno, ang pagkagumon sa tawo sa ilegal nga drugas maghatag og problema sa performance sa hingtungdan nga makaapekto usab sa buhatan nga iyang gitrabahoan.

Nagpaabot ang publiko og maayo nga serbisyo gikan sa labing ubos nga kawani ngadto sa labing taas nga public official. Way maayo nga mapaabot gikan sa usa ka drug user o adik.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph