Naputos sa saway ang Kagamhanan sa Dakbayan sa Sugbo, labina ang Cebu City Transportation Office (CCTO), tungod grabeng kahimtang sa trapiko gikan sa buntag hangtod na sa sayo sa gabii.
Way nakabadbad sa trapiko nga resulta sa nangadaut nga mga sakyanan ug duna say naaksidente.
Di ni bag-o nga problema kay makadaghan na ni nahitabo, apan kagahapon maoy labing grabe. Sayo pa sa buntag nagsugod na og tipun-og ang mga sakyanan. Naay nagyawyaw nga duha ka oras na sila nga wa hapit nakairog sa trapiko.
Pila kaha ang danyos sa mga oras nga nausik tungod sa grabe’ng kahuot sa trapiko? Milyunes ka pesos tingali.
Kay di man una kadto nga higayon, nganong wa man gihapon makahimo og kongkretong lakang ang CCTO? Wa ba diay tun-i ug hisguti sa mga tigom sa traffic committee sa siyudad kining nagbalikbalik nga problema sa south coastal road?
Di ba diay mapangitaan og paagi ang paspas nga paghawan sa mga sakyanan ug pagdiskarga sa mga karga niini? Nigawas man gud nga inutil ang liderato sa CCTO nga napuno na daan sa mga pagsaway tungod sa gipatuman nga mga traffic scheme?
Di ba kaha maayo nga mopatuman og truck van ang Siyudad, kana kon di mahasupak sa balaod, sa specific nga mga oras nga busy ang mao nga highway?
O di man gani, mopalit og ekipo ang Siyudad nga magamit sa ingon niadto nga sitwasyon. Kon abtik kaayo nga makapangita og sayop sa mga drayber sa karsada, nganong di man abtik nga makapangita og solusyon sa problema?Mahimo nang lingkuran ug hisgutan.
Mao nang mapuno na lang sa bugalbugal ang Cebu City kay ang mga tawo wa nakakita bisan gamay sa Singapore ug samot nang wa naka-feel sa Melbourne. Kay layo ra kaayo ang Cebu sa duha ka mga lugar.
Di nimo maingon nga apples to oranges. Tingali apples to mansanitas ang duha ka mga dapit kon pagtandi ngadto sa Cebu City.