Ang paggamit sa social media platform dili ikalimod nga usa kini sa labing dako nga impluwensya sa pagporma sa pamatasan sa pagboto sa bag-ong henerasyon ilabi na sa Gen Z ug Millennials, nga karon naglangkob sa 63 porsyento sa kinatibuk-ang botante niining piniliay.
Matod pa ni Professor Niño Olayvar, Political Science professor sa University of San Carlos, ang social media dili lamang usa ka plataporma sa kasayuran apan usa ka pwersang nag-umol sa panghunahuna sa mga batan-ong botante. Kini nga henerasyon, nga nagpangidaron ug 18 hangtod 35, anaa sa makasaysayanong sitwasyon ilabi na sa teknolohiya ug digital communication sama sa social media nga nahimo nang kabahin na sa inadlaw nga buluhaton.
Sa kasamtangang obserbasyon, makita nato ang kusog nga pagpakita sa mga “listahan sa mga paboritong kandidato” sa social media, ilabi na sa sektor sa estudyante. Dili lang kini pagpakita sa ilang napilian, apan giapil usab ang rason ngano nga ilang gipili kini nga mga kandidato. Kini nga pamaagi nagbukas ug oportunidad alang sa mas lawom nga diskurso ug pagpanukiduki sa mga plataporma ug prinsipyo sa mga politiko.
Mas sayon alang sa mga batan-on nga botante ang pagpangita ug pagsabot sa mga isyu ug mga baruganan sa kandidato. Kini usa ka dakong bintaha, ilabi na sa mga kandidato nga kulang sa pundo apan nakapahimulos sa gahum sa digital nga kampanya.
Apan, bisan pa sa kalapad sa impormasyon, nagpahimangno si Professor Olayvar nga ang katawhan, ilabi na ang kabatan-onan, kinahanglan pa nga molambo sa ilang kahibalo sa lawom nga pagsusi sa mga plataporma sa kandidato. Daghang saad ang madungog sa kampanya apan ang labing importante nga pangutana mao: “Giunsa nila pagtuman ini?” Dili igo nga makadungog lang sa saad—kinahanglan nga masabtan kon kini ba tinuod nga mahitabo ug unsaon kini pagtuman.
Ang paggamit sa social media sa eleksyon magpadayon nga usa ka positibong instrumento sa pagpangusog sa partisipasyon sa batan-ong botante. Apan, ang kasamtangan nga kahimtang nagtawag usab sa mas lawom nga pagpamalandong, kritikal nga pag-analisa, ug responsableng paggamit sa social media. Kay ang tinuod nga gahum sa eleksyon dili lang sa teknolohiya, kon di anaa gihapon sa maalamong pagpili sa katawhan.
Ang social media mahimong giya, apan ang hunahuna ug konsensya sa botante maoy mopatigbabaw alang sa kaugmaon.