Editoryal: Sumasakay nagsugwak

Editoryal: Sumasakay nagsugwak

Katapusa’ng hunat karon, Disyembre 30, sa bul-og sa mga pasahero nga manguli sa ilang tagsa-tagsa ka probinsiya aron pagsaulog sa pagsugat sa Bag-ong Tuig 2024.

Kon karon ka pa molukat og ticket alang sa barko o eroplano, seguro-mapakyas ka human na-fully-booked na human nagsugwak ang mga pasahero ug kadaghan sa sayo’ng nikuha og ticket.

Gani ang tanang kompaniya sa barko ug abyon puno na gikan pa sa wala pay Pasko niadtong Disyembre25, ngadto sa bespiras sa Bag-ong Tuig.

Bisan pa sa mga terminal sa bus ning panahuna, magsugwak usab ang mga sumasakay bisan sa pagdugang sa ilang bus units nga mobiyahe.

Tungod sa kadaghan sa pasahero, magmatngon kanunay tungod sa usab sa paglihok sa dautang mga elemento nga mopahimulos sa panagduot sa daghang tawo sa mga terminal.

Nasayod ang mga malapason nga ang mopauli o mobakasyon sa probinsya magdala og igong salapi aron dunay sarang ikagasto sa kasaulogan ug paghatag og sinugatan sa mga mahal sa kinabuhi.

Kon makuot o malabni ang inyong bag, paet, inay malipayon, magmasulub-on ang pag­pa­uli. Dili matuman ang imong plano nga nagki­nahanglan og salapi labi na sa pag-adam sa mga pagkaon.

Hinuon, nasayod kita nga dunay police desk nga gimuntar ang matag terminal gawas sa mga personahe sa kapulisan nga gipakatap sa palibot.

Abtik sab ang diskarte sa dautang elemento. Maayo motayming o bantayan ang kapu­lisan una molihok sa ilang pag-ataki.

Busa, labaw sa tanan, kita mismo maoy mas responsable sa atong kaluwasan. Sa laktod, dili magtanga-tanga taliwala sa pagduotduot sa daghang tawo sa terminal.

Kon wala pay ticket, mas magpundo una sa dakbayan ug dinhi na lang magsaulog sa pagsugat sa Bag-ong Tuig.

Kon fully booked na, dili mamugos aron dili mag-antos.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph