Editoryal: Tag P20 nga bugas dalaygon kaayo

EDITORYAL
EDITORYAL

Kon naglisod ang Nasudnong Kagamhanan sa pagtuman sa saad ni Presidente Ferdinand Marcos Jr. atol sa presidential campaign nga moabot ang bugas humay og tag P20, himuon kini sa Cebu Provincial Government nga tinuod. Karong Nobiyembre 28, 2023, makapalit na ang mga kabos ug naa sa lista sa kagamhanan sa tag P20 nga kilo sa bugas humay.

Mao kini ang gisaad ni Gobernador Gwendolyn Garcia aron matinuod ang saad ni Marcos nga makatilaw ang katawhan sa tag P20 ang kilo sa bugas. Nipasabot si Garcia nga mas taas ang palit sa Kapitolyo sa matag kilo sa bugas, apan himuon kini niya aron mogaan ang gibati nga kalisod sa mga kabos nga pamilya sa lalawigan.

Di man tanan ang makapahimulos, kadto rang angay nga baligyaan niini tungod sa estado sa ilang pagpuyo.

Taliwa sa mga kabalaka karon nga mograbe pa ang pagmahal sa bugas tungod sa El Niño ug mga kalamidad tungod sa climate change, ang adminitrasyon ni Garcia nakahuna-huna sa pagpagaan sa gibati sa katawhan.

Mao unta ni buhaton sa tanan nga mga opisyal sa local government unit (LGU), pagpangita og paagi unsaon sa pagpagaan sa kinabuhi sa iyang katawhan, di ang pagpangita og away, pagpanggukod sa kaatbang ug pagpatigbabaw sa interest sa katawhan.

Di magpatawag og tigom aron planuhon ang pag takeover sa usa ka buhatan.

Atubangon ang mas importante nga mga suliran sama sa baha, kagubaon sa mga karsada, nagkatag ug baho nga basura ug uban pa.

Kini ra bang proyekto karon ni Garcia sa bugas, tayming kaayo kay di pa ni mao ang pagmahal, mosaka pa ni og maayo kon masinati na og maayo ang “super El Niño.” Miangkon gani ang Dept. of Agriculture nga lisod pang kab-uton ang tag P20 kilo sa bugas humay tungod sa pagmahal sa international market ug di pa makasarang ang kaumahan sa Pilipinas sa supply.

Apan ang Lalawigan sa Sugbo andam magpaalkansi sa pagpalit aron matibhangan ug di magutman ang mga kabos nga pamilya ubos sa iyang jurisdiction. Importante ra ba kaayo ang bugas humay sa katawhan itandi sa ubang mga pagkaon. Bahala og way klaro nga sud-an basta duna lay kan-on.

Ning lakang ni Garcia, segurado nga way magutman nga pamilya, labina sa kabataan. Samutan pa sa iyang lain nga programa nga mao ang feeding sa kabataan nga nagtungha sa publiko’ng mga tunghaan sa lalawigan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph