Dunay managlahi nga panglantaw bahin sa pagpa-ta_ttoo. Matod pa, usa kini ka matang sa pagpadayag o arte. Apan ang uban nagtan-aw niini nga paghugawhugaw sa lawas.
Labing grabe nga panghunahuna mao nga pag-isip nga isog ang tawo nga dunay tattoo labi na sagad sa mga binilanggo dunay daghang tattoo. Sayop kini nga pagtuo.
Hinuon, magdepende kini sa matang sa tattoo nga magsamin usab sa karakter sa imong pagkatawo - dunay subra kaseksi ug grabe kabayolente.
Tinuod nga way balaod nga nagdili sa pagpag-tattoo apan kinahanglan nga sensitibo usab kita sa matang sa tattoo sa lawas human magsamin kini sa atong pagkatawo.
Sayo ning tuiga, ang Philipines National Police (PNP) nimando sa kapulisan sa pagpapas sa ilang dayag nga tattoo sa lawas apan nakasugat og mga pagsupak hinungdan nga dunay moratorium.
Niadtong Lunes, Agusto 19, 2024, gipahibalo ni PNP Chief General Rommel Francisco Marbil nga gilibkas na niya ang moratorium niadto pang Hulyo 3, 2024.
Nagpasabot usab kini nga ang mga aplikante nga gusto nga moapil sa PNP, lakip na ang mga naa sa PNP Academy (PNPA), dili dawaton kon adunay sila'y tattoo bisan pa kini tago, gawas kon ipatangtang kini nila.
Ang mga polis kinahanglan nga modeklarar sa gidaghanon sa ilang mga tattoo nga dili dayag. Ang PNP nagdili sa tattoo bisan tago kini kon extremist, discriminatory ug offensive sa relihiyon, racist, sexist, ug di awtorisado sa usa ka grupo.
Sakto ang PNP bahin sa tattoo. Kinahanglan nga sensitibo ang kapulisan sa pagmintinar sa ilang imahen, dungog, ug pagpatunhay sa pagtahod sa publiko.