Nangreklamo ang mga atleta ug ubang mga delegado sa Palarong Pambansa batok sa mga taxi driver kay sila gipaninglan og dagko nga mga pletihan. Wa pa hinuoy nadakpan sa akto nga namiktima sa mga bisita dinhi, apan duna nay tulo ka drivers nga nadakpan kay naningil og sobra.
Ang duha ang Land Transportation Office (LTO) ang nakadakop samtang ang usa Highway Patrol Group (HPG 7).
Di ni bag-o nga modus kay naa may Palaro o wala, ang lagyo nga biyahe sabotsabuton og pakyaw kay katarungan sa drivers wa silay pasahero sa pagbalik. Nahulog ni nga “standard operating procedure (SOP)” sa kinabag-an sa drivers nga gi-tolerate sa mga sumasakay nga nagkinahanglan sa ilang serbisyo.
Apan salikwaot ug makauuwaw kaayo tan-awon nga gibuhat kini sa mapahimuslanon nga mga drayber sa mga bisita sa dakbayan. Lahi sa mga biyahe sa probinsya nga masabot ra kaayo nganong okay ra sa pasahero nga makasingil sila, ang mga delegado sa Palaro naa ra sa dug-ol nga mga destinasyon, sama sa mga mall, billeting areas ug Cebu City Sports Center ug uban pang sporting venues.
Nanganhi sila diri di aron maglingawlingaw, kon di mangapil sa mga sangka sa paugnat sa kusog human sila naka qualify sa regional meets sa ilang tagsa-tagsa ka region. Kadaghanan usab ani nila di mga adunahan, anak ra og ordinaryo nga mga tawo. Kon wa gani tingali suporta sa local government unit (LGU) maglisod pa sila pag-anhi sa Sugbo.
Mao unta ni ang huna-hunaon sa mga drayber. Di kay pahimudsan na hinuon ang sitwasyon. Sa ilang gibuhat, nga unta pipila ra man ni sila, ang kinatibuk-ang sektor sa public transport ilang napakauwawan.
Unya og panguli nila sa ilang tagsa ka probinsya, manabi ni sila nga di angay mokompyansa kon moadto og Cebu kay ang mga taxi driver mga tikasan, limbungan. Naduhig sa kadaut sa imahe ang kinabag-an sa mga taxi driver nga buotan ug nagtinarong sa ilang pagpanginabuhi sa kalsada. Kay lagi pipila ra nila ning mga badlungon.
Huna-hunaon unta sa mga drayber nga ang ilang panginabuhi nag-agad sa gidaghanon sa mga pasahero nga manakay nila. Kinsa pa may ganahan manakay sa mga taxi kon ang kasinatian sa mga bisita nga manganhi bati kaayo? Mao na nga mas managhan pa hinuon ang ganahan sa mga ride hailing app, sama sa Grab ug Uber.
Sa Metro Manila bitaw, mas daghan ang manakay sa mga mahalon nga taxi nga mogamit og meter kay sa ordinaryong mga taxi nga lipatlipat ang metrohan.