Editoryal: Trabaho sa BRT

Editoryal: Trabaho sa BRT

Gidali-dali sa ‘paglimpiyo’ ang pagtrabaho sa Cebu Bus Rapid Transit (CBRT) project sa Osmeña Blvd. ug kabahin sa N. Bacalso Ave. duol sa Cebu City Sports Center (CCSC) tungod sa nagkaduol na nga Palarong Pambansa diin host ang Dakbayan sa Sugbo karong Sabado, Hulyo 6,

Bisan wa pa kini nahuman apan temporaryong ihunong ang trabaho sa CBRT sa paghatag og kasayon sa mga atleta ug mga bisita nga moagi sa dapit. Mobalik ang trabaho human sa Palaro.

Dili mominos kapin sa 120,000 ka mga atleta ug mga opisyal gikan sa nagkalainlaing rehiyon sa nasod ang gipaabot sa Palaro nga sa pagkakaron, naghinayhinay nang nangabot.

Matod pa, ang mga trabaho sa CBRT gidali-dali sa paghawan sa dapit. Apan dunay bahin nga labina duol sa Fuente Osmeña nga sama sa dili temporayong mahawan ug hinungdan pa sa grabeng trapiko.

Niadtong Martes sa buntag, Hulyo 2, nakasinati og grabeng kahuot sa trapiko sa Osmeña Blvd. duol sa Fuente Osmeña tungod sa dagkong mga sakyanan nga nagbabag sa dapit nga nagdiskarga og dakong puthaw alang sa CBRT bus station.

Busa daghang nagyawyaw tungod sa kalangay sa namugna nga kahuot sa trapiko. Nakapangutana kon nganong gitumong sa paghatod sa mga dagkong materyal atol sa rush hours sa adlaw ug nganong wala buhata sa lawom nga gabii o sa kaadlawon nga minos ang moagi nga sakyanan.

Naunsa man kining trabaho sa CBRT Package 1? Naghatag lang kini og tumang kahasol sa publiko. Apan takos ba kini sa atong pag-antos? Way tino nga tubag sa pagkakakaron taliwala sa daghan nga hugonhugon ug kwestiyon sa maong proyekto.

Pastilan kining CBRT, dili gyud mawad-an og isyo sukad sa pagsugod sa maong proyekto. Maayong mahawan ug mahunong una ang trabaho niini sa pagsikad na sa Palarong Pambansa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph