Editoryal: Trabaho sa karsada hinay pa sa bao

EDITORYAL
EDITORYAL

Ang Metro Cebu dunay railway system kaniadto apan wa na kini ayuha og balik human sa Ikaduhang Gubat sa Kalibutan. Dunay mga estorya nga wa na kini buhia aron molipang ang negusyong transportasyon sa pipila ka mga pamilya nga nanag-iya og bus companies. Apan duna say niingon nga ang tinuod dako kaayo og gasto ang pag-ayo sa railway tungod sa kalapad sa kadaut busa wa na kini ayuha.

Bitaw, mas katuohan ang lapad nga kadaut tungod kay sa gubat, ang railway system usa sa mga transportasyon nga piangan kay makakarga kini og dagko nga mga kargamento ug paspas. Busa mao ni ang piangan og maayo.

Taliwa sa suliran sa trapiko sa Metro Cebu, ang Nasudnong Kagamhanan nagplano sa pagbuhi sa 67 kilometro nga railway system, apan himuon na kini nga subway, gikan sa Dakbayan sa Carcar padulong sa Dakbayan sa Danao.

Gitataw sa Dept. of Transportation (DOTr) nga naa pa kini sa pre-planning.

Samtang maanindot ni nga plano, apan di ba duna may Metro Cebu Expressway nga gisugdan na karon sa pagtrabaho? Nganong di man hinuon tutokan sa Nasudnong Kagamhanan ang pagpadali niini pinaagi sa pagpadali sa funding aron sa ingon mapaspasan ang land acquisition. Karon gud, bisan gani ingnon nga hinay pa sa bao, wa gani kay wa man kini nag-irog.

Si Gobernador Gwendolyn Garcia nahingangha sa tadlasan sa expressway kay duna kini kausaban nga wa siya nasayod. Hayan wa siya gi-update sa Dept. of Public Works and Highways (DPWH).

Mas maayo gani, kon way igo nga funding ang kagamhanan, ipaagi kini og public-private partnership (PPP) kay hayan mapaspas pa, sama sa ubang dagkong mga proyekto sa kagamhanan.

Kada adlaw nagkagrabe ang suliran sa trapiko sa Metro Cebu, gikan sa Carcar hangtod sa Dakbayan sa Danao. Kon magsige lang og estorya ang kagamhanan, magsige lang og tuki uban sa local government unit (LGU), maabtan na lang og tulo ka dekada, wa pay mahitabo sa proyekto.

Maayo pang bao, bisan hinay, kanunay man.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph