Dihang giablihan pagbalik alang sa publiko ang rubberized track oval sa Cebu City Sports Center (CCSC) niadtong Enero 24, 2025, mura kini’g maanindot nga musika alang sa pandungog sa mga mahiligon og pasingot partikyular ang paglakawlakaw ug pagdagandagan.
Mas komportable man gyud hinuon ang pagpasingot sulod sa CCSC track oval gumikan kay gawas nga layo sa peligro, mas minos sab ang polusyon kumpara kon sa kilid sa kadalanan magdagandagan o mag-ehersisyo.
Gawas niini, mas lingaw sab ang magpasingot nga adunay daghang mga kadungan. Mao na’ng gatusan o kapin sa libo ka mga tawo ang andam mokuot sa ilang bulsa aron mobayad sa entrance fee kaysa mag-ehersisyo kilid sa kadalanan.
Hinaut nga dili na sab isira pagbalik sa publiko ang CCSC track oval gumikan sa samang rason – ayuhon kini og balik.
Kahinumdoman nga niadtong Mayo 2023, gisira ang tibuok CCSC gumikan sa dakong renovation nga gihimo niini alang sa pag-host og balik sa Dakbayan sa Sugbo sa Palarong Pambansa niadtong Hulyo 2024.
Kapin sab sa tuig ang giantos sa mga mahiligon og pasingot. Ning panahuna, ordinaryo na nga senaryo nga adunay magdagandagan sa kilid sa kadalanan, sulod sa Fuente Osmeña Circle, sa bakanteng luna sa Ayala. Ambot asa pa kaha ang uban nagdagandagan niadtong panahuna.
Ning panahuna, labing seguro dakong kantidad ang wala naabot sa panudlanan og pundo sa Dakbayan sa Sugbo nga gikan unta sa entrance fee sa CCSC sa matag adlaw. Hinuon, mas mahinungdanon nga ma-renovate ang CCSC.
Giablihan pagbalik ang CCSC usa ka semana sa wala pa nagsugod ang 2024 Palarong Pambansa apan wala pa gipagamit sa publiko ang track oval.
Adunay mga kontrobersya nga nitumaw partikyular sa pagtrabaho sa track oval nga nasuta nga wala nahiuyon sa standard. Taliwala niini, nagpadayon ang Palarong Pambansa.
Pipila ka mga semana gikan sa paghuman sa Palarong Pambansa, gipagamit na pagbalik sa publiko ang track oval.
Apan wala ra magdugay, gisira na sab kini gumikan sa daghang mga guba niini ug giobligar sa kagamhanan sa dakbayan ang contractor, ang SBD Builders nga ayuhon kini. Tuod man, gituman kini sa SBD Builders.
Gikan sa pag-ayo sa track oval, gigamit na kini sa 32nd Cebu City Olympics track events, Sinulog sa Dakbayan ug mismong sa Sinulog Ritual Showdown.
Hangtod karon, wala’y nitumaw nga mayorihiyang reklamo kabahin sa pag-ayo sa track oval. Sa pagkakaron, kudos sa SBD Builders. Ambot lang kaha sa umaabot nga mga adlaw.