Editoryal: Trapik mahimong ‘Manila-like’?

Editoryal: Trapik mahimong ‘Manila-like’?
Editorial Cartoon by Ariel Itumay

Maayong tinguha sa lokal nga kagam­hanan sa pagpangita og solusyon sa pag-alibyo sa nagkagrabe nga trapiko sa dakbayan sa Sugbo.

Maayo usab ang lakang sa pagkuha og mga batid o consultants nga motabang sa pagtuon, pagpatuman sa plano ug uban pa.

Apan walay igong katarungan kon manguha kita og tabang gikan sa giingong mga batid o ahensiya nga wa gani makasulbad sa ilang kaugalingong problema sa trapiko?

Ang kagamhanan sa dakbayan sa Sugbo nangayo og tabang gikan sa Metropolitan Manila Development Authority (MMDA). Kinsa ninyo ang nakaadto sa Metro Manila? Unsay inyong ikasulti bahin sa sitwasyon sa trapiko sa ulohang dakbayan?

Apan kon libre kini nga tabang isip pagpalambo sa relasyon sa duha ka mga lokal nga kagamhanan sa nasod, arang-arang na lang apan dili kasandigan pag-ayo.

Dili ba gusto ni Mayor Michael Rama mahimo kitang Singapore like? Puslan man nga mogasto, maayo pa nga adto mokuha og mga batid gikan sa Singapore. Sa MMDA, paet kon mahimo na hinuon kita nga ‘Manila-like’?

Dayag nga kamatuoran nga dako ang kalahian ang pagkahiluna ug porma sa karaang dakbayan sa Sugbo, inprastraktura sa transportasyon ug bisan ang kultura sa mga Sugbuanon tali sa kaulohan.

Ug daghan nang nangaging pagtuon bahin sa kahimtang sa trapiko sa Sugbo. Kumusta na? Gani dili masalikway nga isyo sa pagtuon sa modernisasyon sa lokal nga transportasyon.

Gihimo pa kin sa mga langyaw nga batid ug creditor banks nga batakan sa ilang pagsanong sa utang, mas kasaligan human ang banko nagtinguhang makabayad ang nangutang kanila.

Laing dayag nga kamatuoran, ang usa sa dakong problema mao ang pagpatuman sa plano sa pagsulbad sa trapiko, labina og sakyan kini og personal nga interes ug pamulitika.

Kon buot hunahunaon, mas labaw nga nasayod, nakasabot ug dunay pagbati ang lumad nga mga Sugbuanon nga batid sa transportasyon. Ang pagkuha sa MMDA maisip nga sagpa sa ilang kapasidad sa propisyon.

Pastilan, ang trapik sa Sugbo mahimo ba kaha nga Manila-like?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph