Editoryal: Trapik sa N. Bacalso Ave.

EDITORYAL
EDITORYAL

Dugang pag-antos ang masinati sa publiko sa grabeng trapik sa N. Bacalso Avenue, dakbayan sa Sugbo tungod sa ulahing kalamboan bahin sa nagpada­yong trabaho sa Cebu Bus Rapid Transit (CBRT) sa dapit.

Ang Traffic Management and Coordination Committee (TMCC) nagdumili sa pag-aprubar sa pagbutang og mga board-up o koral nga gikinahanglan sa pagsu­god sa ilang pagtrabaho sa usa ka bahin sa dalan sa dapit.

Ang CBRT project contractor nangayo og clearance gikan sa TMCC alang sa pagbutang og board-up gikan sa eskina sa dalan P. del Rosario paingon sa eskina sa dalan Leon Kilat ug N. Bacalso Avenue atol sa TMCC meeting niadtong Huwebes sa hapon, Nobiyembre 23, 2023.

Si Cebu City Councilor Rey Gealon, TMCC chairman, niingon ang komite nagduha-duha sa pagsanong sa hangyo tungod sa daghang mga reklamo, nga nag­lakip sa kahuot sa trapiko.

Ang TMCC nilatid og mga kondisyon nga kinahanglan sundon sa kontraktor sama sa Osmeña Boulevard gikan sa Kapitolyo hangtod sa P. del Rosario nga nahuman na ug kinahanglang ablihan alang sa mga sakyanan.

Lakip sa ubang detalye sa pagseguro nga dili mosamot ang kasamtangang problema sa trapiko sa naasoy nga dapit tungod kay naa na kini sa usa sa mga karaang sentro sa dakbayan diin naa ang mga mall, tunghaan ug Cebu South Bus Terminal.

Ubang mga detalye bahin sa demanda sa dakbayan: Trabaho sa CBRT project sa N. Bacalso hayan malangay

Matod ni Gealon, gihatagan og 30 ka adlaw ang kontraktor sa pagtuman sa gitakdang kondisyon.

Nganong wala kini maplastada daan nga rekisitos sa plano sa kontraktor sa CBRT sa wala pa nagsugod ang pro­yekto?

Karon na hinuon nga mahimo kini nga hinungdan sa kalangay ug mas taas nga pag-antos sa publiko.

Sakto ang TMCC, angay ikonsiderar ang publiko labi na nga nakaapekto na kini sa negosyo sa naagian sa CBRT ug ang kita sa sektor sa transportasyon.

Good luck, hapit na ang Pasko.

Takos ba kaha ang pag-antos karon sa katawhan sa CBRT project?

Ang tubag - nagbitay pa sa lanot.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph