Editoryal: Tun-an unta og maayo ang trapiko sa CSCR

Daghan ang nakasaway nga mga motorista sa mibalik og huot nga trapiko sa Cebu South Coastal Road (CSCR). Ang ilang gibasol mao ang traffic light nga giingon nga dunay artificial intelligence (AI). Ang desinyo diay unta sa CSCR mao nga usa kini ka expressway busa angay nga maglahoslahos ang mga sakyanan.

Angay nang tun-an og maayo sa usa ka eksperto nga grupo ang kahimtang sa trapiko sa CSCR nga habig sa Dakbayan sa Sugbo kay wa may problema sa habig sa Dakbayan sa Talisay. Maayo man ang pagkadumala sa Talisay ang ilang habig kay bisan gani dunay maaberiya nga dako nga sakyanan, paspas silang makatangtang niini gikan sa karsada. Mag-update dayon sila sa social media kon mababagan ug mahawan na.

Kanunay nga ang makaingon sa pagkahuot ug pagkaungot sa trapiko sa CSCR mao ang trapiko sa Dakbayan sa Sugbo. Bisan lang gud sa pagkaaberiya sa usa ka sakyanan, mokanit na ang kahuot. Diha pa gani usa ka higayon nga kaadlawon pa ang pagkadaut sa usa ka trak, udto na kini nakuha sa dapit.

Kay nagbalikbalik ang problema, busa something is wrong sa pagdumala sa trapiko sa habig Cebu City kay wa masulbad ang suliran. Ang kahimangud sa mga motorista sa ilang usa ka oras unta nga biyahe nga nahimo nga tulo, anha nila iyabo sa social media.

Kon nibalik ang problema tungod sa usa ka hinungdan, nganong iinsister pa man ni paggamit? Di ba angay nga pangitaan og paagi? Tinuod makaayo sa mga patigayon ug mga namuyo sa South Road Properties (SRP) ang pagbuhat og likuanan kay maghimo kining sayon alang nila, apan nakahasol kini sa kinatibuk-an. Naghimo pang kuyaw sa karsada.

Alang sa win-win nga solution, mangita og eksperto nga mokunsulta ug seryuso nga motuon unsaon pagsulbad ang suliran nga malipay ang tanan, way masakripisyo nga sektor. Makaayo sa general public ug mga establisemento sa SRP.

Sa kasamtangan, ibalik una kon unsay naandan samtang ipahigayon ang pagtuon. Di lang ra ba ni problema sa Siyudad sa Sugbo, kon di sa tibuok isla kay ang CSCR usa ka nasudnong karsada. Angay ilambigit ang Dept. of Public Works and Highways (DPWH) ning problemaha. Angay gani sila ang mokuha og consultant inabagan sa Cebu City ug business sector. Inay magbalikbalik sa pagsuway sa AI nga klaro nga wa makasulbad sa problema sa taas nga linya sa mga sakyanan.